شهد رمزي ترد على عمر طاهر: “يشوف الخطة العايمة وهيعرف إننا مقتبسناش حاجة من فيلمه”

ردت المنتجة شهد رمزي، على اتهامات الكاتب عمر طاهر، بعد مهاجمته صناع فيلم “الخطة العايمة” بسبب تشابه اسم الفيلم مع أحد أفلامه، ويعد ذلك العمل أول أعمال شهد رمزي في مجال الإنتاج.

وقالت شهد رمزي لـ”ET بالعربي”: “الاسم متغيرش علشان في اسم فيلم تاني على اسمه، ومش ده السبب نهائي، ومع احترامي لعمر طاهر إحنا محصلش بينا أي تليفونات، ولما عمر طاهر يشوف فيلمي هيعرف إننا مقتبسناش حاجة من فيلم هنيدي، وفيلم هنيدي منزلش علشان ساعتها نكون فعلا سرقناه”.

وتابعت: “أنا مش هقدر أتابع الإعلانات إن كان في فيلم بنفس الاسم والمفروض كان ينزل من أسبوعين، وإحنا أصلًا مكناش على علم إن فيه فيلم بنفس الاسم، وأظن إنه لما يشوفه هيغير وجهة نظره، وفي النهاية هو كاتب يحترم”.

وكشفت الأسباب التي دفعتها لخوض تجربة الإنتاج للمرة الأولى، وقالت: “اللي شجعني أخوض تجربة الإنتاج الأولى، إن أنا عشت طول حياتي في البيت، مش بسمع غير ده، وللأسف عندي حب غريب لصناعة الفن، فغصب عني بقيت بفهم في حاجات، من وأنا عندي 13 سنة لأني كنت دايما مرافقة لأبوبا وأمي، وهما كانوا بيفهموا في الحاجات دي، فشربت الصناعة دي، وطول عمري عارفة إني في يوم من الأيام هخوض تلك التجربة”.

وتحدثت عن أحداث الفيلم: “هي مهمة بيدخلوا فيها الأبطال، ويسرقوا بنك ولكن العصابة مش على درجة كفاءة عالية”، وعبرت عن حبها لغادة عادل قائلة: “غادة عادل طيبة وزي القمر وبشكرها على أخلاقها وتعاملها معايا الفيلم”.

وأكدت على تفائلها بتحقيق الفيلم نجاحا بمجرد طرحه في دور العرض: “هفضل أركن فيه لحد امتى، إحنا طول عمرنا وإحنا بنفتح مواسم جديدة، والموزع الشاطر وائل عبد الله، لما جينا فكرنا قررنا ننزل الفيلم ونفتح موسم جديد، طالما الوضع ده مش أثر علينا بشكل كبير، وإحنا وحشنا الفيلم الكوميدي، ودي حاجة رزق وفي ايد ربنا، وهو رزق”.

وفيلم “الخطة العايمة” بطولة كل من على ربيع ومحمد عبد الرحمن وغادة عادل وعمرو عبد الجليل بيومي فؤاد وبسنت صيام وهشام محمد شرف وعدد من ضيوف الشرف على رأسهم صلاح عبد الله، إنتاج “أوسكار برودكشن” و” الرمزي برودكشن”، والفيلم من تأليف أحمد عبد الوهاب وكريم سامي، إخراج معتز التوني.

فيلم “الخطة العايمة” يستعين بالمدفعجية في الأغنية الدعائية (خاص)

محمد عبد الرحمن يروج لفيلم “الخطة العايمة” (تغريدة)