ريهام سعيد عن خلافها مع رئيس قناة النهار: “ناس لعبولي في دماغي.. واحنا إخوات دخل بيننا شيطان”

ظهرت الفنانة والمذيعة ريهام سعيد لمتابعيها الليلة، من خلال البث المباشر، لتشاركهم فرحتها بعودتها لقناة “النهار” مرة أخرى، وتفاجأت بسؤال من مهنئيها، كيف لها العودة للقناة بعد خلافها مع رئيس “النهار” والمحاضر التي بينهما.

وأوضحت ريهام خلال البث المباشر عبر “فيس بوك”: “أنا من ساعة ما مرضت وجالي مثلث الموت، ومن الناس اللي بعتلها رسالة كان علاء الكحكي وكنت ساعتها بشتغل في قناة الحياة، بعتله رسالة متزعلش مني، أما عن الخلاف اللي كان بينا، كنت طالعة من أزمة صعبة، ومش هتكلم عنها، ولما خلصت جالي علاء الكحكي البيت وطول ما أنا في فترة السجن كانوا بيذيعوا البرنامج موقفوش ولا حلقة، ولما طلعت كانوا عايزين يمضوا معايا 3 سنين”.

وأردفت: “أنا كنت معمية وكل تركيزي في صدمة إن أنا عايزة أعوض اللي فات اطلع على الهوا من تاني وأجمع فلوس لأني خسرت كتير في الفترة دي، وكانت النهار ساعتها في ضيقة، وروحت عملت محضر أقول إن ليا فلوس، وناس لعبولي في دماغي قالولي إن النهار هتتباع ولو اتباعت مش هعرف اخد فلوسي، فعملت المحضر عشان أثبت حقي قدام اللي هيشتري النهار، وطبعًا النهار اتضايقت جدًا ولكن قناة النهار فضلت تديني مرتبي كل أول شهر في السنة بتاعت فتاة المول، ولم يتخلوا عني دقيقة، وبعد الأزمة فقدت الثقة في كل الناس اللي حوليا كنت متخيلة إن كل الناس بتدبرلي مكايد، وبعدها هما نزلوا بيان مكنش فيه ولا كلمة صح، ولكن كنا غضبانين”.

واختتمت حديثها عن الخلاف: “بعتبرها أخوات أو أصحاب ودخل بينهم الشيطان لأن فيه ناس كتير كان من مصلحة إني أسيب النهار ومضايقة من نجاحي، المشكلة دي متحلتش من انهارده، لا هي محلولة من ساعة ما كنت عيانة وهما بكرم أخلاقهم سألوا عليا، وبردو أول ما خلصت من الأزمة اتصلت بعلاء الكحكي أول واحد وقولتله متزعلش مني، لأنه من الناس اللي عملت النجاح على مدار 6 سنين اللي فاتت، كنت بطلب أي حاجة بتتوافرلي وآرائي انوا بيحترموها، بشكر شبة تلفزيون النهار على إنكو بتمدوا إيديكوا تاني ليا، وإني رجعت لبيتي، ومشتاقة إني أقدم أول حلقة”.

مفاجأة.. “النهار” تعلن عودة ريهام سعيد ببرنامج “صبايا الخير”

ريهام سعيد تتعرض لعملية احتيال من إحدى الشركات: “استغلوا اسمي وصوري”