الجمعة 29 مارس 2024
More forecasts: Wetter 4 wochen
رئيس التحرير
محمود المملوك
أخبار
حوادث
رياضة
فن
سياسة
اقتصاد
محافظات

أحمد يونس يتوعد متسببي حادث وفاة ابن شقيقته

القاهرة 24
فن
الأحد 18/أكتوبر/2020 - 08:14 م

أنشأ المذيع أحمد يونس صفحة باسم ابن شقيقته “مصطفى” عبر موقع التواصل الاجتماعي “فيسبوك”، الذي وافته المنية بحادث أتوبيس المدرسة، يوم 12 أكتوبر الماضي، وذلك للدعاء له بالرحمة والمغفرة، ولتظل ذكراه موجودة معه، وفي نفس الوقت يتوعد متسببي هذا الحادث.

وكتب أحمد يونس عبر “فيسبوك” قصة تلقيه نبأ الوفاة، فقال: “يوم وفاة ابن اختي 12 أكتوبر الحزين الصبح، كنت في برنامجي الصباحي عالراديو، ودايمًا بيكون عندي تقرير مروري، فإذا بي اتبلغ بحادث مروري في التجمع الخامس بين أتوبيس مدرسة وأتوبيس رحلات وتسبب في وفاة طفل 13 سنة والباقي إصابات، قلبي وجعني على أم وأبو الطفل وقولت بالحرف يا قهرتهم على ضناهم، وطلعت من الاستوديو أتأكد من كل زمايلي إن ولادهم وصلوا مدارسهم بسلامه الله، فاتطمنت الحمد لله”.

وأردف: “ورجعت الاستوديو أكمل شغلي كانت الساعه 8، 10 الصبح فإذا بي أتلقى مكالمة تليفونية من أخويا الكبير بيقولي مصيبة يا أحمد مصيبة، كل توقعي إنه هيقولي أمك ماتت، لكن لاقيته بيقولي، مصطفى ابن اختك سماح مات في حادثة أتوبيس مدرسة، الجملة نزلت عليّ صعقتني في كل جسمي، قفلت السكة في وشه وفضلت أقوم وأقعد زي المجنون وأنا مش مدرك اللي سمعته، وعمال أقول لا ده أكيد كابوس وهصحى منه أروح الشغل عادي، سيبت البرنامج ونزلت أجري وأنا مش عارف أعمل إيه ولا أتصرف ازاي، لحد ما روحت ولاقيت الكل موجود عند تلاجة ال—–“.

وأضاف: “ولاقيت أختي سماح في ثبات وتماسك ومفيش على لسانها غير راضية يارب إنا لله وإنا إليه راجعون، الحمد لله، اللهم أجرني في مصيبتي، وبقت تسكتني، ولاقيت حازم والد حبيبي مصطفى في صمت وذهول عمري ما هنساه، وهنا كل اللي مر عبارة عن شريط أسود مفيهوش نقطة بيضا لحد ما ربنا كرمني إني غسلته بنفسي واتطمنت عليه وخدته في حضني أحن حضن في حياتي كلها، أنا عمري ما كنت متخيل إني اغطي حادث وفاة طفل واكتشف إنه ابن أختي ابني وصاحبي وحبيبي”.

واختتم حديثه، بتوعد لكل متسببي ذلك الحادث: “عمري ما كنت متخيل إن الحوادث اللي بنسمع عنها وارد نمر بيها، حق ابننا مصطفى لن يضيع وإذا أبوه وأمه سكتوا عنه بسبب الفاجعة اللي هم فيه أنا مش هسكت عنه، عارف إنه ابننا مش هيرجع، بس على الأقل حبيبي يكون سبب في وجود شوية ضمير عند معدومي الضمير، احضنوا أطفالكم ومتزعلوهمش واسمعوهم، وادعوا دايما إن ربنا ينجيهم من شر الحوادث والفواجع، وادعوا لأم مصطفى وأبوه ولنا ولكل أم فقدت طفلها بالصبر، مع السلامه يا حبيبي”.

https://www.facebook.com/ahmadyounessofficial/posts/10158584656737170 وأعلن أحمد يونس منذ عدة أيام عن وضع حجر أساس مسجد يحمل اسم ابن شقيقته “مصطفى” في العاصمة الإدارية الجديدة، وذلك ليكون صدقةً على روحه.

أحمد يونس عن ابن شقيقته المتوفى بحادث “باص” المدرسة: كان فاضله سورتين ويختم القرآن

أحمد يونس يعلن وضع حجر أساس مسجد بالعاصمة الإدارية باسم ابن شقيقته الطفل ضحية حادث المدرسة

تابع مواقعنا