حسام داغر في ذكرى وفاة أحد أبطال فيلم أمير البحار: “محدش يعرف إنك اتوفيت” (صور)
أحيا الفنان حسام داغر، ذكرى رحيل الفنان محمد فاروق الذي توفي في مثل هذا اليوم 18 أكتوبر عام 2009، حيث نشر عبر حسابه الشخصي بموقع “انستجرام”، مجموعة من الصور للفنان الراحل وعلق عليها.
وقال داغر: “الذكرى السنوية لرحيل صديقي الطيب الممثل الجميل محمد فاروق 18/10/2009 يااه سنين جريت هوا.. فاكر أيام مركز الإبداع وبروفاتنا مع أستاذ خالد ومسرحية قهوة سادة.. فاكر لما اتصل هنيدي على أستاذ خالد جلال واحنا في الجزاير بنعرض مسرحية قهوة سادة، وقالو عاوز حسام داغر ومحمد فاروق معايا في فيلمي الجديد أمير البحار، وأنا وأنت طرنا من الفرحة.. فاكر أيام تصويرنا الفيلم في الغردقة وفي إسكندرية لما جيتلي أنت وفراج قعدتوا معايا كام يوم لما جدتي ماتت، وأنا بصور ومرضتش تسيبني لوحدي”.
وتابع: “فاكر لما وديتني جامع المرسي أبو العباس وفضلت تقرأ الأوراق هناك.. فاكر لما كنت تقابلني في جامع السيدة زينب وندعي ونقرأ الفاتحة ونطلب التوفيق من ربنا وتطلب البركة منها، وتقولي أنا وأنت أصلا من نفس الحي السيدة زينب ولازم تزورها على طول.. فأكر الخروف اللي أنت ذبحته أنت وثروت بعد أول قبض ليك من أمير البحار، وأقولك طب هاتلك أنت حاجة ليك تقولي الفلوس دي بتروح لصحابها”.
حسام داغر يبدأ تحضيرات مسلسله الجديد “المحقق”
وأردف: “فاكر لما تعبت مننا بليل علي القهوة ورحت المستشفى بس شخصوك غلط ومعرفوش أنها جلطة وقلنا لفراج يبات معاك، علشان كان أقرب حد ساكن جمب القصر العيني وأنت طلبت منه يجيبلك جلبيه تنام بيها وشغلت الراديو علي إذاعة القران الكريم ونمت.. فاكر لما أنا وصلت المستشفي الصبح الساعة 9 وكنت جايبلك الفطار سندوتشات فول وطعمية سخنة اللي بتحبها وقابلني فراج على السلم أول ما شافني وقالي فاروق تعيش أنت”.
وأضاف: “وأنا ضربته علي وشه فاكره بيهزر وقلتله الحاجات دي مفيهاش هزار ولقيته انفجر في العياط قدامي، وقالي والله العظيم ما بهزر ورميت الأكل من أيدي وجريت أتأكد من أي حد لقيت حمزة العيلي متماسك، وقالي أمسك نفسك ولازم نبلغ أهله.. فاكر لما جرينا بيك للمدافن وسط عياط وذهول الناس وهنيدي كان في الطريق بيحاول يلحقنا، وفي الآخر قلت له دفنا خلاص وأنا سامع صوت بكاه في التليفون وبيقول النعش طاير مع السلامة يا فاروق “.
واختتم حديثه: “عرضنا الفيلم ساعتها بعد وفاتك والناس ضحكت من قلبها ومحدش يعرف أننا كنا بنبكي كلنا علشان مكنتش معانا ومشوفتوش.. ناس كثير متعرفش أنك توفيت أصلا.. عارف ليه لأنك حقيقي عايش وسطنا ودايماً فاكرين.. في فيلم كوكو كانوا بيقولوا أن الميتين في عالم الأموات لما بيتنسوا ويبطلوا اللي عايشين يحكوا عنهم ساعتها بس بيموتوا الموتة الحقيقية علشان كده هنفضل دايما فاكرينك وبحكي عليك.. وحشتني يا روقه يا كازامولي يا أطيب خلق الله”.
يذكر أن فيلم “أمير البحار”، بطولة محمد هنيدي، وشيري عادل، ولطفي لبيب، وياسر جلال، وحسام داغر، ومحمد فاروق، والعمل من تأليف يوسف معاطي، وإخراج وائل إحسان.
View this post on Instagram