قصة “الشريحة الثانية”.. شكوى جديدة ضد فودافون مصر واتهام بالتزوير

ظهرت شكوى جديدة ضد شركة فودافون مصر، من نهى الناصر، تتهم فيها الشركة بتزوير توقيعها وإصدار شريحة لنفس خطها للاستخدام دون معرفتها.

وقالت نهى عبر فيس بوك “موقف مع Vodafone Egypt، بقالي 3 شهور بينزللي الفاتورة زيادة عن العادي وكنت فاكرة إنها ضرائب أو استهلاك باقات إنترنت إضافي أو أي حاجة، لحد فاتورة شهر سبتمبر كانت ضعف رقم فاتورتي العادية وطبعا استغربت جدا، كلمت خدمة العملا قالولي إن دي فاتورة علي الرقمين بتوعي، قلتلهم رقمين إزاي أنا معايا رقم واحد بس، وعمري ما استخدمت أرقام تانية قالولي لا في شريحة تانية باسمي خط مفتوح بنظام ريد، وبينزل فاتورته كل شهر وأنا بدفعه بقالي 3 أشهر”.

وأضافت “طبعا مكنتش مصدقة نفسي إزاي الكلام ده وأنا ممضيتش على حاجة و لا جبت خطوط تانية، قالولي إعملي شكوي وقسم الشكاوي هيبت فيها، وطلبت يقفلوا الخط، الكلام ده كان يوم 29-7”.

وقالت إنه “بعد أسبوع ونص من الجدالات قالولي الشكوي اترفضت والعقد سليم، قلتلهم إزاي وأنا بقول أنا ممضيتش علي حاجة وعايزة أشوف صورة العقد، قالولي خدي صورة منها في أي فرع .. وجدت الآتي: صورة لبطاقتي متصورة بموبايل ألوان وده طبعا مستحيل يحصل في العقد العادي بيبقي صورة مطبوعة أبيض وأسود”.

وأضاف: “إمضاء مزور مش إمضتي، ومفيش أي اسم فرع أو ختم على العقد يقول أنا رحت المكان ده جبت الشريحة منه وفي اسم موظف ماضي العقد لما كلمت خدمة العملاي بعدها قالولي إحنا مش بنك و أي امضاء بتمشي !!!!!!!!”.

وقالت :”واضح إن في تلاعب ببيانات العملاء في فودافون وده تزوير علني، أرجوكم انشروا البوست عشان ده معناه إن في اختراق لبيانات العملاء وأي حد ممكن يعمل كارثة بالرقم التاني ده ومحدش هيعرف وصاحب الخط هو اللي هيشيل كل حاجة “.

عميل يتهم “فودافون” بتزوير توقيعه.. والشركة ترد

“أنا  عملت شكوى في مركز حماية الاتصالات وهعمل محضر إثبات حالة وشكوي في حماية المستهلك، لو في أي جهة تاني انا مستعدة أعمل فيها أي إجراء قانوني وخوفي مش بسبب الفلوس اللي ادفعت أو لسه هتدفع، خوفي على خصوصية البيانات بتاعة العملاء و تفعيل خطوط وهمية بدون الرجوع لصاحبها المزع”..

يذكر أن هذه الشكوى الثانية ضد الشركة في أقل من 24 ساعة، حيث كتب محمد طاهر، أحد عملاء فودافون الشركة بالتزوير في أوراق امتلاكه للخط واستخراج خط مزدوج يستخدمه شخص آخر في نفس الوقت، وبعد التقدم بالشكوى ماطلت الشركة في حل المشكلة بردود وهمية، وقالت إنه تم توقيع السماح بالخط المزدوج منذ ثلاث سنوات في شهر كانت فية الأمطار غزيرة و”بوظت الورق”.

وكتب طاهر، عبر صفحته على فيس بوك إنه لاحظ تغيرًا في استهلاكه للإنترنت ما جعله يلجأ لخدمة العملاء والتي كشفت له أن لديه شريحة أخرى “Multi sim”، بنفس رقم الخط، وقد يكون الاستهلاك من خلالها.

وأكد أنه لا يعلم عن الشريحة الأخرى أو حاملها أو تفاصيل استخراجها.