إلهام شاهين: “طول عمري بعمل الأدوار اللي بتخاف منها النجمات”

الثلاثاء 24/نوفمبر/2020 - 11:58 م

أكدت الفنانة إلهام شاهين، أن اختيارها لفيلم “حظر تجول”، الذي سيشارك في فعاليات مهرجان القاهرة السينمائي، جاء بعد فيلمها رقم 100 في مسيرتها الفنية “يوم للستات”.

وتابعت في لقاء خاص عبر برنامج “كلمة أخيرة” الذي تقدمه الإعلامية لميس الحديدي على شاشة ” ON” قائلة: “من وأنا صغيرة كانوا يقولولي نفسك في إيه؟ كنت أقول نفسي أعمل 100 فيلم وكنت حاسة إنها حاجة بعيدة جدًا وقتها لكن بعد أن نجحت وقمت بعمل 100 فيلم وأنا صغيرة.. توقفت وقلت لنفسي هعمل إيه تاني؟ لأني عشت كل المواقف اللي ممكن تتعاش في بطولات فنية في 100 فيلم بالاضافة لانتاجي من المسرحيات والمسلسلات”.

وتابعت: “قلت لنفسي هعمل إيه تاني؟ خاصة وأنا مش بحب أكرر من نفسي كتير وأقلل من نفسي وعشان أنا مجنونة سينما وفن مكنش من السهل ألاقي حاجة جديدة”.

وواصلت: “في حظر تجول وقبل قراءة السيناريو وخلال قراءتي في المشهد الأول وجدت أن القصة تدور حول سيدة قضت نحو 20 عاماً في السجن فقررت وقتها أن أقوم بالفيلم دون قراءة بقية الأحداث.. وقلت لنفسي وقتها لسه فيه حاجة الواحد ممكن يعملها رغم أنو عمل 100 فيلم “.

وحول طبيعة دورها وقبولها بدور سيدة كبيرة السن في الفيلم قالت: “عمري مافكرت أختار أدواري بالسن طول عمري بعمل أدوار كتيرة بتبقى أكبر من سني فيه فنانات بتحب تبقى أصغر من سنهم لكن أنا بحب أعمل أكبر في السن وهذا بالنسبة لي تحدي خاصة أني فنانة مش معتمدة على شكلها ولا عشان هي حلوة ولا عاملة شعرها في الكوافير أنا بس بحب التمثيل وأنا ممثلة”.

وأردفت: “ماعنديش ثقة في نفسي في أي عناصر أخرى غير أن أنا ممثلة فقط مش مهم أظهر بشكل إيه ولا سن إيه؟ وأنا بعتز بده جدًا.. طول عمري بعمل أدوار يخافوا منها النجمات فمش بخاف، أطلع قبيحة في دور ولا أكبر من سني وأنا طلعت في دور أم لناس قريبين مني في السن زي أشرف عبد الباقي وعمرو سعد وهشام سليم، لا أعتمد على شكل أو مظهر أو لبس ولا سن بعتمد فقط على الأداء ممثلة فقط”.