الخميس 28 مارس 2024
More forecasts: Wetter 4 wochen
رئيس التحرير
محمود المملوك
أخبار
حوادث
رياضة
فن
سياسة
اقتصاد
محافظات

تزوجت من خليجي فاختطف ابنتها وهرب.. قصة أم تعاني من فقدان طفلتها منذ 12 عامًا (خاص)

القاهرة 24
كايرو لايت
الأربعاء 02/ديسمبر/2020 - 08:50 م

وسام درويش شابة مصرية، تزوجت من شاب خليجي كان يدرس في مصر، عانت لمدة 12 عاما من فقدان ابنتها، حيث اختطفها زوجها وسافر إلى بلاده وانقطعت كل سبل التواصل معه منذ عام 2009.

تقول “وسام” لـ”القاهرة 24″: “تزوجته ومعظم أهله كانوا يعيشون في مصر معه ومستقرين هنا، وكان عندي ابنة أخرى لأني مطلقة، ورغم أن أهلي رفضوه لكني كنت أرغب بشدة في ترك منزل أهلي، فواجهتهم بزواجي منه سواء وافقوا أم لا في 2006”.

طفلة وسام
طفلة وسام

وتابعت وسام: “في 2009 اكتشفت أنه مريض صرع وكان يضربني ويقطع هدومه فطلبت منه أن أعيش بجانب أمي وفعلا وافق وأجر لي شقة، وطلب مني إجهاض الجنين في المرة الأولى ولكن في المرة الثانية رفضت، وأنجبت ابنتي منه، مضيفة:”فجأة لقيت أهله بيسافروا واحد ورا التاني بسبب مشكلة حدثت مع أخوه، فسألته  أنت هتسافر؟ قالي لا، لو هسافر هاخدك معايا، فقلت له لا، إحنا كان اتفاقنا من البداية إني مش هسافر عشان بنتي التانية، أنت سهل تروح وتيجي، فقالي تمام عندك حق”.

عقد زواج وسام على مواطن سعودي
عقد زواج وسام على مواطن خليجي

ليلة قاسية لم تنسَها الأم ليلة لم تكن على البال ولا الخاطر، حيث ذهبت ابنتها فيها بلا وداع مسبق، فتقول: “في آخر رمضان جه يوم الخطف، حصلت حاجات كتير لو كنت ركزت فيها ممكن مكنش حصل ده كله، في البداية اتصلت بي فتاة تعمل في السفارة، وسألتني أنتوا مسافرين؟ قولتلها لا، قالتلي خلي بالك على بنتك ونفسك، بعدها اتصل بي زوجي وقالي أنا خلصت شغل وجاي، وقالي “سامحيني لو عملت لك حاجة تضايقك افتكرته بيعتذر على اللي فات وهيبطل عصبية”.

لحظات لم تنسَها وسام بعد مرور 12 عامًا، حيث تحكي تفاصيل الواقعة، فتقول إنه بعد أن وعدها بالانتقال للعيش في الزمالك، وعندما تجهز للنزول بكت الطفلة عليه، فتقول: “لأول مرة أسمح له بالنزول بها بمفردهم، لأني كنت خائفة من أن يأخذها ويهرب، وبالفعل سمحت له بأخذها وندمت على ظني به”. 

شهادة ميلاد الطفلة المخطوفة
شهادة ميلاد الطفلة المخطوفة

وأضافت: “فضل بره لحد الساعة 12 وأنا وأمي قلقنا، نزلت قعدت مع أمي لحد الساعة 2، أمي قلقت وقالتلي يالا نروح له النادي، أول ما دخلنا النادي قالوا لنا بقاله شهور مجاش، وبعد اتصالات في واحد صاحبه قال إنه سافر والطيارة طلعت من ساعتين”.

بندم شديد وحسرة قلب تضيف وسام:” لو كنت قدمت شوية كنت لحقت بنتي، أنا مش فاكرة حاجة غير إن أمي فجأة وهي بتكلم شخص بتعيط غصب عنها، ببص لقيت الراجل بيضرب كف على كف، ففهمت اللي حصل”.

عاشت في الصدمة شهرين، حتى لم تستطع تنظيف البيت أو الاهتمام بمظهرها، حيث تقول: “قعدت شهرين لا بنضف البيت ولا بهتم بنفسي وكان أسوأ رمضان عدى عليا، رفعت قضية بعد ما فوقت وسحبت كل الفلوس اللي معايا والمحامي طمني أنه هيرجعها، وفعلًا جاب لي حكم، وبعدها المحامي قالي الخطوة الجاية لازم نسافر يا أنا وأنت ومحرم يا أنا وتوكيل منك، والتكاليف 50 ألف ومكنتش معايا فلوس وقولتله أنت موعدتنيش بكدة قالي أنا جبتها لك على الورق فاضل نسافر”.

المشكلة كانت في المال، حيث أنفقت كل ما تملك ولم يعد في جيبها قرش واحد، استكملت حديثها قائلة: “مكنتش معايا إن نسافر والمحامي قالي أنتي حرة أنا جبت لك الحكم، وبعدين قالي ممكن نروح السفارة، فقلت له تمام، وفي السفارة قالوا لنا “إحنا ما نقدر نساعدك هو بالنسبة لنا مواطن خليجي وخد بنته وسافر”.

هيئة الأرصاد: أمطار على الإسكندرية.. وطقس يميل للدفء

وتابعت: “بعد كدة عرفت أنه سافر أمريكا لحد 2016 ورجع لبلده بعدها، وكان كلمني بعد حوار القضية طمني أنه هيخلص ورق البعثة وهيرجع بيها ومن بعدها اختفى تاني وكل ما أكلمه يقفل السكة في وشي، وغير كل أرقامه وحظرني من كل حساباته هو وأهله، فقررت أني أدخل أتفرج على صور البنت وخلاص ومش هكلمه”.

أثناء البحث في حسابه الشخصي لاحظت وجود شخص مصري عنده، فتابعت الأم المكلومة : “لقيت ولد معلق على الصورة دخلت كلمته وقولتله أنت تعرف البنت اللي في الصور ديه قالي آه ديه آلاء بنت صاحبي، فحكيت له إنها بنتي وإني معرفش حاجة عنها فقالي أنا مش هقدر أعملك حاجة لأني مصري وعايش هنا فطلبت منه يجيب لي صورها اللي حاططها على الأكونت للأصدقاء أشوفها وبالفعل بعتها لي، ساعتها اتصدمت، البنت كبرت جدًا”.

رؤية صور ابنتها بعد 12 سنة فراق

بعد 12 عامًا من الفراق جعلت وسام تتذكر أيام الفراق الأولى التي كانت مؤلمة جدًا عليها، فتقول: “رغم إني كنت متعايشة مع الوضع بعض الشيء ولكن نفسيتي كانت مش مظبوطة وسبت بنتي الكبيرة لماما فبقيت أزورها كل فترة لأنها جنبي وقلبي جمد بعد ما التانية راحت، بقيت بعمل أي حاجة عشان مفتكرش، وعشان مبنش موجوعة قدام الناس، وكان يراودني أفكار سيئة مثل “ليه يا رب خدت مني الصغيرة وأدتني الكبيرة مصابة بالتوحد” بس بعد كدة فوقت وعرفت إن التفكير ده غلط وبقيت راضية بحالي”.

قرار تسلم الطفلة لأمها
قرار تسلم الطفلة لأمها

وأكملت لـ”القاهرة 24″: “فكرت السنة ديه في حل إني أنزل حكايتي على السوشيال ميديا ونزلت الحكاية ولقيت تفاعل كبير عليها من الناس، في نفس اليوم لقيته مكلمني ويتحايل عليا احذف المنشور ووعدني أنه هيخلي البنت تكلمني في التليفون وفي شهر 1 وعدني إنه هيجيبها لي أو ياخدني ليها وفعلا صدقته وحذفت المنشور، وقلت أكيد البنت صعبانة عليه، وخلاها تكلمني مرة واحدة وبعدها عملي حظر وبعت لي مع صاحبه أن زوجته الثانية متضايقة من كلام بنتي معي ومش عايزاني أكلمها تاني”.

وعن تفاصيل المكالمة مع ابنتها تقول وسام: “قبل ما يخليني أكلم بنتي قالي متحكيلهاش حاجة عن اللي حصل، فهميها بس إن حصلت مشكلة وأنا سافرت، وأنت عزلتي ورقمك ضاع ومعرفتش أوصل لك، بس إياك تجيبي لها سيرة إني وحش عشان في الحالة ديه أنا هموت وبنتك هتكرهك، وبالفعل عرفتها الكلام ده، ودلوقتي عامل لي بلوك ومش عارفة عنه حاجة تاني”.

تابع مواقعنا