ريهام سعيد بعد حلقة الثعالب: “أنا كنت طالعة رحلة صيد زي باقي الناس ومش هعدل على الصيادين” (فيديو)
أوضحت الإعلامية ريهام سعيد حقيقة ما جرى في حلقة أمس من برنامجها “صبايا الخير” التي كان هدفها هو تسليط الضوء على نشاط صيد الحيوانات في مصر، وتصديرها للخارج.
وقالت ريهام سعيد في “لايف” عبر حسابها الرسمي بموقع التواصل الاجتماعي “فيس بوك”: “إحنا ابتدينا الحلقة وقولنا إننا عايزين نركز على المهنة بتاعت صيد الحيوانات، واللي هي موجودة وليها تصاريح وكل حاجة، وقولنا إن ليها استخدامات كتير، والراجل قال في الحلقة إنها بتستخدم في الجامعات ومراكز البحوث، وبيتاخدوا يتعمل عليهم أبحاث ويتاخد منهم أجسام مضادة، ولو الدكتور ملاقاش الأجسام المضادة دي، بيرجعوه تاني، يعني مش أنا اللي خليت الراجل يصطاد علشان أصور، ودي مهنة موجودة وبتحصل، ومزارع كتير أوي بتعمل كدة وبتصطاد”.
وتابعت: “أنا كنت رايحة أصور رحلة صيد، والراجل قالي إحنا بنصطاد ديابة وثعالب وثعابين، وأنا معرفش إحنا هنصطاد إيه، ولا أعرف طريقة الصيد إيه، أنا طالعة رحلة صيد زي باقي الناس، ودي الطريقة اللي بيصطادوا بيها، وأنا مليش دخل بيها، ومهنة الصيد موجودة لأغراض كتيرة، وأنا كنت بغطي حلقة صيد، وفي الحلقة كان واضح إني مش مبسوطة بالطريقة اللي بيصطادوا بيها، ودورت وشي وهما بييربطوا رجله، ولما الراجل جه يربط رجله سألته هي دي الطريقة اللي بتصطادوا بيها، أصل أنا مش هعدل عليهم، ولا أنا أعرف الثعلب بيتمسك إزاي”.
ريهام سعيد ترد على مهاجميها: “الناس داخلة فيا شمال أوي” (فيديو)
أول تعليق من ريهام سعيد عقب الهجوم عليها بسبب حلقة “صيد الثعالب” (صورة)
