ملخت دراع ابني.. مواطن يكشف تعرض نجله لعاهة مستديمة أثناء الولادة على يد طبيبة
كشفت التحقيقات في القضية رقم 1509 لسنة 2024 والتي تتضمن تحرير سيدة محضرا ضد طبيبة، لاتهامها بالتسبب في إصابة نجلها حديث الولادة، بعاهة مستديمة بأحد المستشفيات بالجيزة.
زوج يكشف تعرض نجله لعاهة مستديمة علي يد طبيبة أثناء الولادة
وكشف التقرير الطبي بأوراق المحضر أن الصغير يبلغ من العمر 48 يوما، والذي يفيد بوجود ملخ منذ الولادة في الطرف العلوي الأيمن، وبالتشخيص تبين إصابة الضفيرة العصبية للطرف العلوي الأيمن، أدى إلى ملخ الولادة.
وكشفت التحريات أن الطبيبة تعمل بإحدى مستشفيات منطقة أكتوبر بمحافظة الجيزة، وتسببت في حدوث عاهة مستديمة لصغير أثناء ولادته.
وقال زوج الطفل المجني عليه الذي تعرض نجله لعاهة مستديمة بسبب الإهمال الطبي بالتحقيقات: اللي حصل إن إحنا روحنا للدكتورة سعيدة. ع وكنا بنتابع معاها الحمل من شهر اكتوبر 2023، وكنا متفقين إن مراتي هتولد معاها لحد يوم 16 يونيو 2024 مراتى نزل عليها مية الولادة، وبعتت للدكتورة وقالتلها استني ساعتين، وبعدها روحنا المركز بتاعها اللي اسمه جنين للولادة، ولما روحنا مراتي دخلت العيادة عشان تكشف على الولادة، ولما كشفت عليها قالت لها إنها مش هتعرف تولدها في المركز عشان هي لوحدها، والمركز مش مجهز للحالة بتاعتها، وقالت لي إحنا لازم نروح مستشفى تانية ورحنا لها الساعة 5 مثلا وعلقوا ليها محلول، وطلق صناعي، وجهاز في بطنها عشان يشوفوا نبض الجنين.
وأضاف الزوج: وبعدها كل شوية تيجى تفحص مراتي، وتمشى وقالت لمراتي إن رأس الجنين لسه عالية منزلتش، فالتمريض قال لمراتي قومى اتمشى عشان الراس تنزل شوية والدكتورة كل ما تشوف مراتي بتتمشى تقولها اطلعى اقعدي فوق ومراتي طلبت منها ان لو فيه خطر على حياة الجنين لو ولدت طبیعي ممکن تولدها قيصري، وهي قالت لها إن حنا زى ما إحنا وهنولد طبيعي، وغرفة العمليات جاهزة ولما دخلوا هما فضلوا يحاولو يزقوا في الجنين عشان ينزل بس مكنش بينزل ولما ولدت مراتي الطفل نزلوه الحضانة، وقالوا لنا إنه هيقعد ساعتين في الحضانة.
وتابع الزوج: وبعدها خرج دكتور الحضانة وقالى إن إيد الطفل اليمين بتتحرك بنسبة ضئيلة جدا وإحنا هنعمل إشاعة عشان نشوف في كسر ولا لا؟ عملوا الإشاعة، وملقوش كسر، راح الدكتور قالى إحنا كدة هنحتاج نشوف دكتور مخ وإعصاب، وبعدها رجعنا لدكتورة سعيدة بالليل وراحت فضلت تشوف الطفل، وقالت لنا خير إن شاء الله هنبقى نودية عيادة مخ وأعصاب بس بعد مدة عشان مفيش دلوقتي، ومشينا من المستشفى وبعدها يومين الصفرا عليت على الطفل، وأخدناه الجمعية الشرعية وهما قالوا لنا إن اللي حصل ده نتيجة إن الطفل اتشد من إيده ساعة الولادة، وبعد كده قعد أسبوع في الحضانة، وهما قالولنا نروح لدكتور عظام.
وأردف الزوج: ولما روحنا لدكتور قالنا ده ملخ ولادة وده أكثر درجة في الملخ عشان هو كده مش هيقدر يحرك إيده تاني وبعدها روحنا لدكتور مخ وأعصاب وقالنا إن درجة الإصابة شديدة جدا ودرجة الإعاقة كبيرة جدا، وروحنا للدكتورة سعيدة وقولنا لها حاولى تعالجية قالت لنا ده مش خطئي وسيبناها وروحنا القسم وعملنا محضر.
