سيدة تستغيث بعد وفاة صغيرها: مستشفى تبارك بالقاهرة الجديدة موتوا ابني بسبب الإهمال
استغاثت سيدة تدعى نجوى عبد الواحد، بعد وفاة صغيرها محمود، 5 سنوات، داخل مستشفى، وزعمت أن إهمال الطبيب المشرف على الحالة تسبب في وفاة ابنها.
سيدة تستغيث بعد وفاة صغيرها
وقالت نجوى لـ القاهرة 24: ابني سخن وتعب روحت بيه مستشفى تبارك القاهرة الجديدة، كان داخل معايا على رجله، الدكتور كتبله حقنة مضاد حيوي، وطلب من الممرض يعمل اختبار حساسية.
وأضافت: عمل اختبار حساسية على يد ابني محمود، وإيده احمرت لكن الدكتور قال اديله الحقنة، بعد ما ابني اخد الحقنة طلع مادة بيضة من فمه، وقالي يا ماما وأغمي عليه.
وتابعت: حاولوا يفوقوه ويعملوله إنعاش ولما سألت الدكتور قالي: احنا عالجناه، وقالولنا خدوه على مستشفى سيد جلال، كان في الوقت ده ابني جنبي ميت أصلا، بس هما كانوا عايزين يخلوا مسؤوليتهم.
واستطردت: رحنا بيه لمستشفى سيد جلال في باب الشعرية، قالولنا ابنك مات بسكتة قلبية.
وأردفت: والد الطفل رفع قضية على المستشفى ولما روحنا نسأل على اسم الدكتور، المستشفى رفض يدينا الاسم، وقالولنا انتوا خرجتوا من المستشفى بيه سليم.
وواصلت: حسبي الله ونعم الوكيل فيهم، محمود عنده 5 سنين لسه، وكنا داخلين بيه على رجله عنده شوية سخونية، احنا مش هنسيب حقه.
