ميران عبد الوارث: شكل الفنان بيحصره في نوعية أدوار معينة.. وعمر أفندي نقلة في مشواري
حققت الفنانة الشابة ميران عبد الوارث، نجاحًا كبيرًا خلال الفترة الماضية بعد مشاركتها في مسلسل عمر أفندي بطولة الفنان أحمد حاتم، كما تصدرت تريند مواقع التواصل الاجتماعي بعد تصريحاتها الإذاعية الأخيرة.
أبرز تصريحات ميران عبد الوارث الإذاعية
- والدي الفنان الراحل أحمد عبد الوارث، ودخولي المجال الفني والتمثيل مكنش مخطط له ولكني مبحبش كلمة صدفة، ولكن هو كان قدرا.
- كان نفسي أدخل طيران وأبقى كابتن طيران، وكلمت والدي وقالي خدي الشهادة الأول وبعدين نشوف موضوع الطيران.
- بعد ما دخلت الجامعة غيرت رأيي، ووالدي مكنش عايز يزرع جوايا حب الفن علشان هو مجاله، وأنا كنت بتكسف جدًا وأنا صغيرة.
- لغاية دلوقتي تقيل عليا أني أصور وأطلع على الهواء.
- نفسي أمثل مسرح ولكن مجاليش فرصة لغاية دلوقتي كويسة أوافق عليها، وأداء المسرح غير السينما والتلفزيون.
- أول ما بدأت قعدت سنتين يتعرض عليا أعمال وأنا مبسعاش خالص، وكنت بقول في نفسي هو أنا أستحق ده؟، ولكن ربنا كاتب ده ليا، وكنت بستغرب المخرجين عرفوني منين.
- مسلسل كلبش كان العمل الوحيد اللي والدي حضره قبل وفاته، وقالي إيه الحضور ده؟ أكنك بتمثلي بقالك كتير.
- مسلسل عمر أفندي كان كله تحديات، وكنت حابة أني أعمل حاجة مختلفة عن اللي عملته قبل كده، والعمل جديد ومتعملش قبل كده والناس بتسألني على الأحداث في الشارع، وأنا مبسوطة أني جزء من التجربة.
- مسلسل عمر أفندي نقلة في مشواري الفني، وأنا حاليًا في وقفة مع نفسي أني هعمل إيه بعده وهختار إزاي الأعمال، ونفسي أفضل محافظة على المستوى والإحساس أني دايمًا بقدم حاجة مختلفة وناجحة.
- شكل الفنان بيحكمه في نوعية معينة من الأدوار، وكل ما كان الممثل شاطر يقدر يستخدم أدواته يقدر يوسع ده مع أن الموضوع صعب.
- فكرة أن الإنسان بيجي عليه فترة ميشتغلش فيها بتكون قاسية أوي، والإنسان بيلوم نفسه ولكن الموضوع بيكون أكبر منه أنه يقول على نفسه مُقصر.
- لما قعدت سنتين من غير شغل رحت اشتغلت في شركة إعلانات، وموقفتش تجارب أداء للمخرجين وعملت 6 أفلام قصيرة وكانت شخصيات صعبة وفيها تحديات.
- معنديش تيك توك ومش عارفة ولا فاهمة ليه الناس بتعمل تيك توك.
- نفسي لو ربنا كرمني بـ بطولة أجسد حالة إنسانية في المجتمع ميكونش ليها صوت، وبعدين يتسلط الضوء عليها لما أعملها.
