لاعب الإسماعيلي: ماهربتش من المباريات.. ومحدش احترم تعبي ومجهودي مع النادي
كشف محمد دسوقي لاعب فريق الإسماعيلي، حقيقة تهربه من خوض المباريات الأخيرة في مسابقة الدوري المصري الممتاز.
وكتب دسوقي على صفحته الشخصية بموقع التواصل الاجتماعي فيس بوك: أولا حابب أوضح حاجة مهمة لجمهور الإسماعيلي الكبير اللي أنا بحترمه جدا، ومكنتش راضي أتكلم فيها غير لما الموسم يخلص على خير عشان معملش دوشة للناس وهما شغالين بس كمية الرسايل والكلام اللي بيجيني لازم يخليني أرد وأوضح موقفي.
وأضاف دسوقي: موضوع عقدي والتجديد أنا اتكلمت مع كابتن علي وعماد في غرفة مغلقة وحلفت على المصحف، إني لو هاخد 10 جنيه برا هاخد في الإسماعيلي 7 جنيه واتفقنا وقومنا والدنيا زي الفل من القاعدة دي لحد آخر يوم في النادي ليا ولا حد كلمني ولا حد فاتحني في أي حاجة أنا اللي كنت بروح أقول للكابتن عماد فين اتفاقنا يقولي لسه مش عارفين هتعمل إيه بسبب النتايج ومش عارفين مين مكمل ومين ماشي دي أول حاجة.
وأكمل دسوقي: عشان الكابتن علي بيقول إني سبت النادي في أهم ماتش وهربت أنا طالع من ماتش البلدية بين الشوطين أنا اللي طلبت التبديل، وكابتن إيهاب شاهد على الكلام دا لما روحنا قطر كنت مسافر مع الفرقة بس مكنتش عامل حسابي إني هلعب واتمرنت أول لما روحنا لوحدي بعد الماتش حسيت بشد في الخلفية أول ما رجعنا القاهرة عرفت الكابتن إيهاب أن رجلي وجعاني وهروح أعمل إشاعة عليها وطلعت فيها شد في الإشاعة محتاجة 10 أيام راحة يعني أنا معرف الكابتن إيهاب كل حاجة وكل الكلام اللي بيتقال كدب ومفيش نص كلمة منه صح ولو أنا عايز أعمل كده كنت عملت كده من يناير وقعدت في البيت أنا احترمت النادي لأخر يوم ليا فيه بس محدش احترم تعبي وإخلاصي للنادي طول فترة عقدي وعمري ما عملت مشكلة حتى وأنا مباخدش فلوس عقدي كاملة خلال 3 سنين في النادي.
