من العتاب لـ الشكر.. القصة الكاملة لأزمة علي الطيب وأسرة مسلسل عمر أفندي
أثار الفنان علي الطيب الجدل خلال الساعات الماضية بعد حديثه عن صناع مسلسل عمر أفندي بطولة الفنان أحمد حاتم، وذلك بعد استعانتهم بمصطلح (دي حاجة 13 خالص)، الذي قاله الطيب في مسلسل أهو ده اللي صار، ولم ينسبوه إليه.
تفاصيل أزمة علي الطيب وصناع مسلسل عمر أفندي
وكانت البداية عندما كتب علي الطيب عبر حسابه الشخصي بموقع التواصل الاجتماعي فيس بوك: حابب أبارك لكل زمايلي في عمر أفندي على نجاحهم، بجملة وديع البساطي المشهورة دي حاجة 13 خالص، واستنوا على الجزء التاني لغاية ما أفكر لكم في الجديد منه، عشان تعرفوا تقلدوه، تحياتي للي نجحوا بمصطلحاتي، وطول عمرها اللعبة ليها أصول وبنتعلم من بعض، مش بنعلم على بعض.
وتواصل القاهرة 24، مع الفنان علي الطيب لمعرفة تفاصيل القصة ورسالته لصناع مسلسل عمر أفندي، حيث قال: صحابي اللي ماسكين الصفحة عندي على فيس بوك كانوا عايزين يكتبوا ده من بدري، وأنا كنت رافض، لكن استغربوا إن باقي الصفحات عمالة تنسب الجملة لـ عمر أفندي فكانوا عايزين يوضحوا.
وأضاف علي الطيب: أنا معنديش مشكلة، والجملة دي مش أنا اللي اخترعتها، لكن محدش كان يعرف يعني إيه حاجة 13 خالص، وأي ممثل بيجتهد علشان يطلع حاجة من الشخصية أو لزمة وبتتحفر في ذهن الجمهور بيكون مجهود علشان يحصل.
وأردف: صفحات مسلسل عمر أفندي قعدت تقول إن محمد صلاح أو ليفربول استخدمت الجملة الأشهر في مسلسل عمر أفندي، طب الجملة دي مين اللي قالها قبلكم؟، محدش نسبها لصاحبها نسبوا نجاح الجملة ليهم، دول زمايلي ونجحوا وإحنا عارفين أصول المهنة، لو زميل ليا اعتذر عن عمل وأنا مترشح له بروح أكلمه أستأذنه الأول.. دي أصول.
علي الطيب يحذف منشور رسالته للأسرة عمر أفندي
وعاد علي الطيب وحذف منشور رسالته لـ أسرة مسلسل عمر أفندي، وكتب عبر فيس بوك: أنا ممكن أكون عبرت بشكل يزعل زمايلي من اللي اتكتب بس هما زعلوني بأنهم مذكروش في أي برنامج أو أي لقاء أنهم اقتبسوها من وديع البساطي في مسلسل أهو ده اللي صار، مصطلح موجود في مصر زمان فعلًا مش أنا اللي اخترعتها، بس بيبقى كل ممثل بيبذل مجهود من أجل الشخصية تبقى لحم ودم مش كلام على ورق فقط وبيقول كلامه وخلاص، وده كان جزء من مجهودي اللي تم أثناء تحضير الشخصية في المسلسل وبعد ما عرضت بعض المصطلحات على الأستاذ السيناريست عبدالرحيم كمال والأستاذ حاتم علي عليه رحمة الله.
وأضاف: اخترنا اللي يتناسب مع الشخصية التي تعبر عن شخصيته واتوظف في الحوار بشكل مناسب ومنطقي للمشاهد من الأستاذ عبدالرحيم، واتعرض المسلسل وربنا كتب لنا القبول في قلوبكم، ونجح المسلسل واتشهرت شخصية وديع البساطي بمصطلحاتها اللي تعتبر كانت جديدة على الجمهور رغم أن الجملة ليها أصل ومعنى ووضحناه في المسلسل، وأظن احنا في مهنة واحدة يعني عارفين شغل بعض ونعرف بعض كويس وبينا كل خير، لا يمكن يجيلي عمل فني أو اسكريبت واكتشف أن في جملة أو مصطلح مشهور لزميل ليه ونجح بيه وأكرره أو اتجاهل مجهوده هو وصناع العمل واحترم نجاحه.
علي الطيب يوجه الشكر لـ أحمد حاتم
وبعد عرض حلقة أسرة مسلسل عمر أفندي مع الإعلامية منى الشاذلي، وجه الفنان علي الطيب الشكر للفنان أحمد حاتم، وكتب عبر فيس بوك: شكرًا من القلب لصديقي المحترم أحمد حاتم على توضيحه في حلقة الأستاذة منى الشاذلي وده العشم يا أحمد يا ابن الأصول.. على راسي تقديرك ليه، وعتابي في الأول عشان أكون واضح كان للي كتبوا المسلسل، وأن كل الممثلين في عمر أفندي صحابي وعشرة عمر، وهرجع أقول مفيش بينا غير كل خير، وأنا بعترف أني مندفع لما بكون على حق، بس مش طول الوقت ينفع نعبر عن اللي مضايقنا حتى لو على حق، وأوقات كتير الصمت بيبقى أفضل.
واختتم علي الطيب: شكرًا يا حاتم مرة تانية وأنت عارف غلاوتك عندي، وأي كلام صدر على صفحتي مكانش يخصك خالص، لأني لو زعلان منك شخصيا كنت كلمتك على طول وربنا يكرمك دايمًا ويكتب لك الخير.
