ارجع بلدك.. الصيدلي السوري بعد إهانة سيدة له: اللي حصل حالة فردية والمصريين شعب طيب
تداول مستخدمو مواقع التواصل الاجتماعي مقطع فيديو لصيدلي سوري مقيم في مصر، يرد فيه على سيدة مصرية وجهت له إهانة به خلال تأدية مهام عمله، حيث ظهر في الفيديو صوتها وهي تقول له: بقولك ارجع بلدك.
وقال الصيدلي السوري، في مقطع فيديو له عبر حسابه بموقع التواصل الاجتماعي تيك توك، أنا مصطفى عدنان صيدلي سوري مقيم في مصر، واللي ظهرت في الفيديو المنتشر عبر منصات التواصل الاجتماعي، أنا دارس صيدلة في مصر وواخد الثانوية العامة من مصر، وبشتغل في الصيدلة من 5 شهور، والحمد لله كل الناس في المنطقة عارفيني ومحدش اشتكى مني قبل كده ولا حد حد زعل مني قبل كده.
ارجع بلدك.. الصيدلي السوري بعد إهانة سيدة له: اللي حصل حالة فردية والمصريين شعب طيب
وتابع: الموقف باختصار إنه من كام يوم دخلت السيدة الصيدلية وطلبت منتجات عناية بالبشرة، كانت بنتها طالباها وموصية عليها قبلها، ووفرنها لها، الأم أول لما دخلت الصيدلية تفاجأت إن الصيدلي سوري وفضلت تقولي ارجع بلدك، فين المصريين اللي هنا؟، انت اخدت فرص عمل المصريين، وفضلت تزعق قدام الناس في المكان وصوتها كان عالي، والكاميرات بتاعت الصيدلية مصورة كل دا.
وأضاف مصطفى عدنان، صيدلي سوري مقيم في مصر: بعدها بـ 10 دقايق بنتها وصلت الصيدلية وفضلت تعتذر عن الموقف اللي والدتها عملته، وقالتلي همسح الفيديو وخدت الطلبات بتاعتها ومشيت، ولكن اتفاجئت إن الفيديو أصبح تريند ومازال منتشرا على السوشيال ميديا.
واستكمل مصطفى عدنان: أنا صيدلي شغال في صيدلية لها مدير مصري، ومعايا إقامة سارية ووالدتي مصرية وأهلها كلهم مصريين، والبلد سامحة لي بمزاولة الصيدلة بشكل قانوني في أي صيدلية، واللي حصل ده حالة فردية، والشعب المصري من أطيب الشعوب ودائمًا بيقف مع السوريين، وأنا حاسس إني وسط أهلي وناسي، ولا عمري حسيت اني غريب، ودي كانت أول مرة اتعرض للموقف ده.
