بعد إنقاذ صغيرتها.. سيدة تحذر من جيم شهير بالتجمع الأول: بنتي كانت هتغرق مني
حذرت سيدة تدعى آية، والمقيمة بـ منطقة التجمع الخامس، التابعة لمحافظة القاهرة، من جيم شهير، بـ التجمع الأول بعد ترك جليسة الأطفال لـ ابنتها البالغة من العمر عام ونصف، في حوض الاستحمام الخاص بالجيم، وأغلقت الباب عليها، حيث واجهت الصغيرة خطر الغرق وظلت تبكي لساعات.
وقالت آية عادل، في تصريحات خاصة لـ القاهرة 24: أنا اشتركت في الجيم اللي اسمه your gym من فترة، وجيت روحت class كان في الجيم وسبت بناتي الاتنين في kids area التابع للجيم عشان بخاف عليهم، واحدة منهم عندها سنة ونص والتانية 6 سنين.
وأضافت: بعد ما خلصت الـ class بتاعي، روحت أبص على البنات حتى قبل ما أغير هدومي أو نتحرك، روحت بصيت عليهم من بره بس ملقيتهمش خالص، ولما قابلت المُدرسة بتقولي إنتي فين ده بنتك الصغيرة مغرقة نفسها، وبالتالي توقعت أن البنت وقعت على نفسها مياه.
سيدة تحذر من جيم شهير بالتجمع
وواصلت: لقيت بناتي واحدة بتعيط والتانية بتصوت، بعزم ما فيها، اتفاجأت أن بنتي الصغيرة مقفول عليها باب الحمام وعمالة تصرخ، ولما سألتهم قافلين عليها ليه قالولي ده عشان متخرجش، ومنظر بنتي كان فظيع قاعدة في البانيو والحنفية مفتوحة عليها ومتغرقة ستر ربنا أن البنت مغرقتش أو ماتت، بنت صغيرة زي دي كان ممكن نفسها يتكتم وتموت ومحدش يحس بيها.
واختتمت: أنا مش هسكت على اللي حصل وهعمل محضر في البنت عشان أحذر الأمهات من الجيم ده والكارثة اللي ممكن تحصل لولادهم، ولقيت كومنت لأم بتقول إن ابنها كان في الـ kids area ولسانه اتقطع.
