أول تعليق من والدة الطفلة صاحبة صورة صلاة التراويح بالأزهر: باباها شالها عشان كانت بتعيط والناس دعيتله
تصدرت صورة لـ طفلة يحملها والدها خلال صلاة التراويح تريند مواقع التواصل الاجتماعي خلال الساعات القليلة الماضية، حيث حمل الأب الطفلة على كتفيه خلال الصلاة، مما أثار إعجاب مستخدمي مواقع التواصل الاجتماعي.
أول تعليق من والدة الطفلة صاحبة صورة صلاة التراويح في الأزهر
وقالت شروق البدري والدة الطفلة في تصريحات خاصة لـ القاهرة 24: لما روحنا نصلي التراويح في الأزهر، وكان نفسي أصلي فيه جدا خاصة إني مش بروحه كتير، غزل أول ما شافت الزحام خافت وقعدت تعيط حتى وأنا شيلاها، ولسه بحاول اسكتها واحدة قالتلي: حبيبتي اطلعي بيها بره أنتي كده كده صلاتك مش مقبولة، موقف عمري ما نسيته ولا هنساه.
وتابعت: خدتها وطلعت أعيط أنا وهي بره، واتأثرت نفسيًا جدًا، عبد الرحمن جوزي اتصل في نص الصلاة يتطمن علينا قولتله أن غزل بتعيط وأنا مستنية بره لحد ما هو يخلص صلاة، قالي هاجي أخد غزل أنا هعرف أتعامل معاها، خدها ودخل يصلي بيها وهي سكتت في حضنه وبطلت عياط وعرف يصلي، وأنا دخلت كملت صلاتي واتبسطت بشعور صلاة التراويح من غير نظرات أو كلمات من الناس.
وأضافت: يومها عبد الرحمن قالي إنه شاف ناس صورته وناس كتير صوروه، وبعد ما روحنا البيت اتفاجئنا بالصورة علي صفحة الأزهر الشريف، ومبسوطة أن الصورة تريند تاني عشان غزل تستاهل دعوات حلوة.
