طوارئ في الأهلي لتجهيز فيديو التعاقد مع زيزو |خاص

بدأ مسؤولو النادي الأهلي، التجهيز لتصوير الفيديو التقديمي لصفقة أحمد سيد زيزو لاعب النادي الزمالك الحالي، والذي سينتقل إلي المارد الأحمر، بداية من الموسم المقبل. 

وعلم القاهرة 24 من مصادره أن مسؤولي الأهلي، أصدروا تعليمات للإدارات المختلفة داخل النادي بداية من إدارة الاعلام والتسويق والعلاقات العامة، من أجل بدء التجهيز للفيديو التقديمي لصفقة زيزو، الصفقة التي نجحت شركة الكرة في إنهائها لصالح الفريق، لتدعيم الصفوف في المواسم المقبلة، وقبل انطلاق منافسات كأس العالم للأندية الصيف المقبل. 

وعلق أحمد سيد زيزو لاعب نادي الزمالك على الأزمة التي يمر بها مع الفريق في الفترة الأخيرة، خصوصًا في ظل وجود مفاوضات بينه وبين العديد من الأندية أبرزها الأهلي، وأزمة تجديد عقده مع نادي الزمالك. 

أول تعليق من زيزو على انتقاله للنادي الأهلي

وقال زيزو عبر ستوري له على حسابه الرسمي على إنستجرام: الحمد لله، أنا راجل بحترم كل الناس، لكن للأسف عدم ردي علي المعلومات المغلوطة، والتزامي الصمت زاد عن حده، كل ساعة خبر عن توقيع أو تجديد عقد زيزو، وكل واحد بيغازل الشريحة اللي عايزها من الجمهور.

وأضاف: بكل وضوح أنا لم أوقع لأي نادٍ سواء داخل أو خارج مصر.. اللي حصل على توقيعي يتفضل يعلن.. إذا كان كلامه صحيح؟.. كمان اللي عنده دليل على توقيعي لأي نادٍ برضو يتفضل يطلعه على الملأ.. الناس لازم تعرف كويس. أنا بقدر جدًّا الكيان الكبير اللي أنا بلعب فيه.. ولا يمكن أنكر فضله عليا. لكن فيه حاجة أنا مكنتش حابب أتكلم فيها خالص.. لأنه للأسف الأمور في الإعلام كلها في إتجاه واحد.. ليه محدش اتكلم عن حقوقي المشروعة زي أي لاعب في الدنيا.. ليه محدش اتكلم إن الناس سابتني بقالها شهور طويلة ومش عايزين يجددوا عقدي. ليه محدش اتكلم عن المستحقات المتأخرة اللي ليا بقالها كتير. ومش لاقي حد يجاوبني ليه محدش اتكلم إنه التجديد المرة دي جاي في مرحلة متقدمة من عمري بالنسبة للعيبة الكورة.. ولعيب الكورة مهما طول عمره قصير في الملعب.. 

وواصل زيزو: محدش كمان اتكلم إنه ربنا سبحانه وتعالى أنعم عليا بعروض مقابلها المالي 10 أضعاف العرض اللي موجود.. ورغم كل ده. قلت وهفضل أقول أنا منتظر كلمة النادي. ورد الاعتبارات كتير مش لتجميل الصورة. والجماهير لازم تكون عارفة الحقيقة.. زيزو مش بيزايد.. ولا بيتاجر.. لكن لازم الطرف الثاني يكون عايزني أكمل.. وتكون فيه استجابة لربع المعروض عليّا على الأقل... لكن للأسف الكلام معايا حاجة.. واللى بيتقال للإعلام حاجة تانية.. أنا مينفعش أجرّح في حد. ولا أتكلم في حق حد.. لأن اللي بيتقال في الجلسات عيب يتقال برة.. على الأقل من ناحيتي. 
واختتم زيزو: أنا مستني رد النادي لحد آخر يوم في الكونفدرالية.. وأتمنى ربنا يكرمنا بيها أنا وزمايلي. وأي كلام هيتقال غير كدة في موضوع التجديد أو التوقيع قبل الموعد ده. هيكون كلام غير صحيح. ورسالتي الودية جدًا للمسؤولين في النادي اللي أنا يحترمهم جميعا.. أتمنى الحوار في مسألة تجديد العقد يكون بيني وبينكم... مش عن طريق الإعلام.. وأنا كنت ولا زلت واضح معاكم في كل اللي اتكلمت فيه من أمور عادلة تساعدنا على إننا نكمل الطريق. شكرًا على تفهمكم موقفي.