حسام أنتيكا يعلن اعتزاله تصوير الأفراح: فيها حرمانية
أعلن حسام أنتيكا، أشهر مصور في مصر، اعتزاله تصوير الأفراح، إذ نشر مقطع فيديو عبر حسابه بموقع فيسبوك، موضحًا من خلال أسباب اعتزاله.
حسام أنتيكا يعلن اعتزاله تصوير الأفراح
وقال حسام أنتيكا، أشهر مصور أفراح في مصر، في مقطع فيديو له، عبر حسابه الرسمي بموقع فيسبوك: أنا بطلت تصوير الأفراح بعد رحلة 10 سنين، اكتشفت أنه فيه حاجات كتير فيها حرمانية، وتصوير الأفراح مش حرام، ولكن في شروط كتير لازم تتعمل عشان ميبقاش الموضوع حرام.
وأضاف حسام أنتيكا: الأفراح في مصر كلها صعب إني أحقق فيها الشروط دي، وممكن أحقق حاجات بسيطة منها، وحتى اللي كان بيبطل عشان حرام وبيقول كدا كنت بستغربه جدًا، وكنت بقول في الأول والآخر أنا بعمل شغلي، هو أنا بعمل أيه غير إني بحط الكاميرا وببتدي أصور.
وأكمل حسام أنتيكا: ولا كنت ببص بطريقة مش حلوة أو نيتي فيها أي حاجة خالص، ولكن دلوقتي مش هقدر أقول أيه الضوابط والشروط دي لأن أنا مش شيخ ولا رجل دين، ولكن اللي اقتنعت به وفهمته إن اللي بعمله في تصوير الأفراح حرام، وأكيد أنا ما زلت بعمل حاجات تانية ممكن تكون حرام، وربنا يهديني ويدلّني على الخير.
وواصل حسام أنتيكا: أشهر مصوّر أفراح في مصر، على الرغم من إن تصوير الأفراح كان بيدخلي مكسب كبير، إلا أن أنا دلوقتي نفسيتي أحسن الحمد لله وراضي عن كل حاجة، وعشان ابني اللي جاي ودي تكون بداية كويسة.
