حنان ماضي: طلاقي كان ابتلاء.. وأصعب حاجة مريت بيها لما رجلي اتكسرت وقعدت على كرسي متحرك
كشفت المطربة حنان ماضي، تفاصيل حياتها الشخصية وطفولتها ووفاة والدتها، بجانب الحديث عن فترة طلاقها وتعرضها لوعكة صحية وإجرائها عملية جراحية.
وتحدثت حنان ماضي، في حوارها ببرنامج لحظة تجلي، تقديم الزميلة منى عقبي عبر القاهرة 24: من ساعة ما جيت الدنيا والمعجزات بتحصلي، من أول ما ماما توفيت وأنا عندي 9 سنين، كنت لوحدي وستي الله يرحمها كانت بتربي 4 وعندها 70 سنة بتعمل الأكل بالعافية.
وأضافت حنان ماضي: بكلم ربنا كتير وبشكره على أنه معايا وكل حاجة بتحصلي بفضله، وأصعب حاجة مريت بيها لما رجلي اتكسرت كسر مضاعف وركبت شرايح ومسامير وقعدت على كرسي متحرك.
وواصلت حنان ماضي: أزمة طلاقي كانت ابتلاء ولكني كنت بقول لـ ربنا إذا لم يكن بك غضب عليّ فلا أبالي، أي حد عنده ابتلاء في ولاده أو صحته أو عدم جواز كل ده الأنبياء مروا بيه، منقولش ليه يا رب، لأن اللي إحنا فيه ده كله زيف وكذب، وإحنا رايحين الناحية التانية وفيها جوائز حلوة إن شاء الله.
حنان ماضي تكشف كواليس عودتها للفن
وسبق وكشفت المطربة حنان ماضي، كواليس عودتها للفن من جديد، إذ قالت في لقائها مع القاهرة 24: فترة الغياب كنت عايشة من الحفلات، لكن مفيش تسليط ضوء عليّ، رغم إن حفلاتي كلها كانت كامل العدد، والجمهور لسة فاكرني وبيطلبوا مني أغني زي الهوا في حفلاتي، ونجاحي في هذه الغنوة كان فضل من ربنا عليّ، والنجاح الكبير ده دايمًا بيحصل مرة مبيحصلش تاني، لكن الجمهور سند لأي فنان وأي فنان من غير الجمهور صفر على الشمال.
