بسبب الصعيد والمدارس اليابانية.. مصطفى بكري يوجه رسالة إلى وزير التعليم
قال النائب مصطفى بكري إن قضية التعليم في مصر دائما مثيرة للجدل، معلقا: اللي بيحصل حاليًا يعتبر إصلاح تاريخي ما حصلش من سنين، رغم الهجوم اللي بيواجهه الإصلاح ده من أصحاب المصالح، زي أصحاب السناتر والدروس الخصوصية والكتب الخارجية.
حل كثافة الفصول في المدارس
وأضاف مصطفى بكري في تصريحات له ببرنامج «حقائق وأسرار» المذاع على قناة «صدى البلد»، أن الوزير محمد عبد اللطيف حل أزمة الكثافة الطلابية في 60 ألف مدرسة، وأصبحت الكثافة أقل من 50 طالبًا في الفصل، علاوة على التعامل مع أزمة عجز المعلمين، ما يعد إنجازًا كبيرًا نحييه عليه.
وأضاف: الوزير بنفسه نزل في 4 شهور زار 400 مدرسة مفاجأة، يشوف بعينه إيه اللي بيحصل، وده مهم عشان نطوّر العملية التعليمية، ونحل مشاكلها على أرض الواقع، ومن الإنجازات كمان إنه تم ضم الحجرات الإدارية في المدارس وتحويلها لفصول، واتعمل نظام الورديتين في بعض المدارس، يعني الصبح تبقى إعدادي وبالليل تبقى ثانوي، وده ساعد كتير في مواجهة الكثافة.
مصطفى بكري: الصعيد محتاج مدارس يابانية
وشدد مصطفى بكري على أن الصعيد مظلوم في ملف التعليم، قائلًا: يا معالي الوزير، الصعيد محتاج مدارس يابانية، محتاج تطوير حقيقي، ومحتاج وجود للمدارس القومية والدولية، خصوصًا في المحافظات اللي محرومة من ده، مختتما: الدولة ماشية في الطريق الصح، لكن الحرب لسه شغالة، وعارفين إن المعركة كبيرة، والمعارضة جاية من أصحاب المصالح، لكن التعليم مابقاش رفاهية، ده بقى أولوية وطنية.
