مدرب منتخب مصر الأسبق عن مونديال 2018: علي جبر وطارق حامد اتخانقوا مع مسؤولي الزمالك ليلة مباراة السعودية
كشف محمود فايز المدرب المساعد الأسبق لمنتخب مصر رفقة هيكتور كوبر المدير الفني الأرجنتيني للفراعنة، عن مفاجآت ليلة مباراة مصر والسعودية في الجولة الثالثة والأخيرة من مجموعات كأس العالم 2018 في روسيا، والتي انتهت بتفوق الخُضر 2-1.
تصريحات محمود فايز
وقال محمود فايز في تصريحات إذاعية: ليلة مباراة السعودية لقيت 1000 رسالة، ومكالمات بتجيلي من مصر مفادها إن علي جبر وطارق حامد اتباعوا من الزمالك لـ بيراميدز.
وأضاف: روحت الأوضة لقيت علي جبر وطارق حامد بيتخانقوا مع مسؤولي الزمالك وبيقولوهم أنتم إزاي تبيعونا من غير إذننا ودا كان الساعة 3 الفجر، فـ قولتلهم بكرة قدامكم تاريخ تكتبوه إزاي دا بيحصل دلوقتي؟، وصلاح متضايق واحنا كنا في المعسكر متضايقين وكمية تفاصيل كان لها أثر سلبي عليا.
وأشار محمود فايز في تصريحاته: قبل نصف ساعة من بداية المباراة عبد الله السعيد قال لـ المدير الإداري غيرلي تذكرتي مش هرجع على الطيارة الخاصة بتاعتنا، أنا هرجع إنجلترا عشان فيه بلاغ للنائب العام إن أنا لو رجعت مصر هيتقبض عليا بسبب الـ 40 مليون جنيه بتوع الزمالك.
وواصل: احنا من قبل المباراة أصلًا كنا عايزين نعمل تغييرات على التشكيلة، ومستر كوبر كان متردد يبدأ بالأساسي ولا نغيّر، وكوبر كانت وجهة نظره نلعب بنفس التشكيلة، وكل دي أزمات ولكن دا مش بسبب خسارتنا الـ 3 مباريات.
واستكمل محمود فايز تصريحاته قائلًا: قبل ما نسافر من مصر لـ روسيا أوضة صلاح كان بيتخبط عليها واتصلنا بالشرطة عشان نأمن اللاعب، وكان فيه خناقات، والموضوع كان مرعب.
واختتم تصريحاته: قدمنا مباراة جيدة ضد الأوروجواي دفاعيًا، ومباراة روسيا -اتلبّست- لـ كوبر.
