أبرز تصريحات صابرين: وحيد حامد قال عليا أحمد زكي الممثلات.. وأكبر قرار غلط في حياتي أني بعدت عن الغناء
حلت الفنانة صابرين، ضيفة على الإعلامية مها الصغير، في برنامجها السهرة، المذاع عبر شاشة قناة CBC، وتحدثت خلال اللقاء عن تفاصيل حياتها الشخصية ومشوارها الفني وموقفها من عمليات التجميل.
أبرز تصريحات صابرين في برنامج السهرة
- لما قلت أني بشرب شوربة كوارع علشان الكولاجين الناس اتريقت وقالوا دي عاملة بوتكس وعمليات.
- إحنا بنعمل كل حاجة حلوة، وبحقن حقن نضارة وبروح لدكتور يظبطلي وشي، لأننا بنتعرض لإضاءة ومجهود ذهني وعصبي، ولكني معملتش عمليات جراحية.
- وحيد حامد قالي أني أحمد زكي الممثلات، وده لأني بعمل أدوار كتير ومختلفة، وكمان بعد ما اشتغلنا زينب الغزالي سوا.
- من أهم الحاجات اللى سببت تعب شديد للراحل أحمد زكي هو إنه كان عايش لوحده فكمان ما كانش بيفصل عن الشخصية.
- عملت شخصيات كتير الجمهور صدقها برغم إن مفيش شبه بيني وبينهم زي أم كلثوم، وزينب الغزالي.
- أنا واخدة الحياة ببساطة لأننا طول الوقت بنعمل أدوار معقدة، والابتسامة لازم تبقى على وشنا طول الوقت ودي حاجة صعبة جدًا.
- طول عمري طلباتي في الدنيا بسيطة وعندي رضا عن اللي وصلت له.
- بقول لنفسي جملة كل ما أنزل أروح أصور دور جديد، وهي أوعي تبقي محترفة خليكي هاوية، علشان أفضل محتفظة بروحي بتاعة زمان.
- نفسى أعمل الدور بتميز زي ما كنت في البدايات، لأني لو بقيت محترفة وواثقة بزيادة في نفسي مش ها أنفذ الدور مظبوط.
- دوري في مسلسل أهالينا، الصعوبة إنه شبهي جدًا فصعب أمثل، والسهولة إنه قريب مني.
- أكتر حاجة غلط خدتها في حياتي هي إني بعدت عن الغناء وركزت في التمثيل بس، رغم إن ده كان ليه أسباب.
- الفنانة شادية أعتبرها أهم ممثلة جات في تاريخ السينما المصرية والعربية، كمان الفنانة سعاد حسني معاها، وده لأنهم متنوعين جدًا، وقدموا كل حاجة من مختلف أنواع التمثيل.
