محمود سعد: اشتغلت في التليفزيون علشان الفلوس.. وأخاف ربنا يسألني جبتها منين
قدم الإعلامي محمود سعد، نصائح لـ الشباب حول كيفية الحصول على أموال، مؤكدًا أنه لم يفكر أبدًا في الكسب من طرق غير مشروعة.
وقال محمود سعد، في مقطع فيديو عبر قناته بموقع يوتيوب: الفلوس تيجي إزاي؟ بسيطة شوف أي تاجر مخدرات واشتغل معاه هيجيلك فلوس كتير وتتمسك أو لأ ده نصيبك، ولكن أنا عمري ما فكرت، مع إن تاجر المخدرات كان بيقعد معانا على القهوة، لأنه حرام وربنا هيسألنا جبت الفلوس منين.
وواصل محمود سعد: مش لازم تفسد علشان يجيلك فلوس ولكن لازم تجتهد، فيه ناس كتير اجتهدت أكتر مني 100 مرة ولكن محققوش حاجات كتير من اللي أكرمني بيها، وأهم حاجة أنك متبقاش متلهف وتوزن المسألة.
وأردف سعد: في أوائل التسعينات كنت باخد 5000 جنيه وكان مبلغ كويس جدًا، وناس قالولي 15000 وهتبقى في منصب أعلى، بس أنا مرتاح في المكان اللي أنا فيه ومبسوط ومرضتش، وقولت أنا مش كلب يترمي له عضمة زيادة يأكلها، وعمري ما اتلهّفت على حاجة ولكن كان في سعي مطلق.
محمود سعد: اشتغلت في التليفزيون علشان الفلوس
واختتم: لما اشتغلت في التليفزيون كان علشان الفلوس بس، ومكنش عندي ترتيبات فيما بعد البرنامج الـ 30 حلقة لأني مكنتش متكالب، ولازم يتعرض عليك تنازلات علشان الفلوس تيجي أسرع، ولكن مفيش أجمل من أن الرزق تكون عامل فيه مجهود.
