سهر الصايغ عن تكرار تعاونها مع مصطفى شعبان: مريح وبيعرف يختار النفوس المظبوطة
أعربت الفنانة سهر الصايغ، عن سعادتها الكبيرة، بتكرار تعاونها مع الفنان مصطفى شعبان، وآخرهم في مسلسل حكيم باشا، الذي عرض في السباق الرمضاني الماضي 2025، بجانب حديثها عن مسلسل الطاووس.
وقالت سهر الصايغ، في لقائها مع الإعلامية منى الشاذلي، في برنامجها معكم: دي مش أول مرة أتعاون مع الفنان مصطفى شعبان، وهو مريح جدًا في اللوكيشن وزكي وبيعرف يختار النفوس المظبوطة، وهو متواجد في رمضان على مدار 15 سنة فاتوا وفاهم الجمهور عايز إيه وبيحب كل الناس اللي حواليه تبقى مساحتهم كبيرة وحلوة.
وعن مشاركتها في مسلسل الطاووس، علقت سهر الصايغ: مسلسل الطاووس كان من الأعمال المهمة جدًا بالنسبة ليا وحسيت أنه فيه رسالة مهمة، وكان بقالنا كتير في الدراما متناولناش النوع ده من القضايا.
سهر الصايغ ترد على انتقادات لهجتها الصعيدية في حكيم باشا
ومن ناحية أخرى، ردت الفنانة سهر الصايغ، على انتقادات لهجتها الصعيدية في مسلسل حكيم باشا، قائلة: الجمهور يقول اللي هو عايزه وعلى راسي، إحنا بنعمل العمل وعارفين ومنتظرين تقييم الجمهور، وكتر خيرهم أنهم شافوا المسلسل، وقعدنا فترة طويلة نتدرب على اللهجة الصعيدي وكل مركز وكل نجع ليهم لكنة ومصطلحات خاصة بيهم.
