خالد يوسف: الرقابة سبب تدمير السينما وقللت سقف الإبداع.. و90% من أعمالي طلعت زي ما أنا عايزها
تحدث المخرج خالد يوسف، عن الرقابة على المصنفات الفنية، مؤكدًا أن 90 % من أفلامه ظهرت للنور بعد مشاحنات مع الرقابة، موضحًا أن رفض الرقابة للأعمال الفنية يؤثر على القوة الناعمة في مصر وتأثيرها في العالم العربي.
وقال خالد يوسف، خلال لقائه مع القاهرة 24: أنا شايف إن الرقابة هي أساس تدمير الفن والسينما والفنون بشكل عام، بالذات لما يكون فيه تحسس وخوف أن الجمهور هيعترض أو مؤسسة وياخدوا بالأحوط ويمنعوا أو يحذفوا، ده مُناخ محبط جدًا ومقيد للإبداع، ويقلل سقف الإبداع في مصر، بل ويقلل من قيمتنا كقوة ناعمة بنؤثر في محيطنا العربي.
وأردف خالد يوسف: مفيش عندي فيلم إلا ودخلت في مشكلة مع الرقابة عشان يطلع، يعني 90٪ من أفلامي إلا وقعدت في خناقة مع الرقابة عشان تطلع بالشكل ده، وعمري ما حذفت كادر الرقابة طلبته، وطلعت أفلامي زي ما أنا عايزها من أول لآخر فيلم.
خالد يوسف يعلق على شائعات اعتزاله الفن
وعلق المخرج خالد يوسف، على شائعات اعتزاله الفن، قائلًا: انتشر خبر إن أنا أعلنت اعتزالي وده كلام مش حقيقي، في الأول مهتمتش وبعدين لقيت الناس بتتناقلوا على أنه خبر حقيقي فاضطريت أطلع أقول إنه خبر عارٍ من الصحة، معتقدش إني هفكر في الاعتزال، لأن البني آدم طول ما هو عايش وقادر على العطاء مينفعش يعتزل، وأنا من مدرسة يوسف شاهين اللي قعد يبدع لغاية آخر يوم في عمره.
