محمد عبد الرحمن عن انقسام الآراء حول مسلسل برستيج: تجربة استثنائية.. ولولا اختلاف الآراء لبارت السلع
علق الفنان محمد عبد الرحمن، على انقسام الآراء حول مسلسل برستيج، الذي تعاون خلاله مع الفنان مصطفى غريب، والمخرج عمرو سلامة، موضحًا أن انقسام الآراء يعني نجاح العمل وتأثيره في الجمهور.
وقال محمد عبد الرحمن، في تصريحات تليفزيونية: لما اتعرض عليا مسلسل برستيج حسيت إنه غريب وجديد، وفكرة اللوكيشن الواحد بتقلق الممثل، وحسيت إن أنا فعلًا شغال في كافيه ونسيت إني ممثل، والموضوع كان يشد جدًا، وفكرة إن عمرو سلامة يبقى المخرج كانت مفرحاني والحمد لله التجربة بتتكلم عن نفسها ورأي الناس هو اللي مفرح الواحد.
وأضاف محمد عبد الرحمن: المسلسل كان صعب جدًا في تصويره، واللي صبرنا أن كيميتنا كانت حلوة مع بعض، وارتبطنا ببعض جدًا والموضوع والعلاقة بينا كانت حلوة جدًا، والمسلسل كان ممتع جدًا واللمة كانت حلوة وده من فضل ربنا علينا.
محمد عبد الرحمن: مسلسل برستيج تجربة استثنائية
وواصل: مسلسل برستيج تجربة جديدة واستثنائية على كل اللي موجود فيها سواء الممثلين ومهندسين الديكور والإنتاج، واحنا ارتضينا نخوض التجربة وفي مثل بيقول لولا اختلاف الآراء لبارت السلع، هيعجب ناس ومش هيجعب ناس، دي حاجة كويسة وأنا بحب أسمع النقد اللي يقولي إنت غلطان في إيه قبل ما أسمع الرأي اللي بيقولي برافو عليك، بالعكس مبتضايقش لما حد يعلق ولكن دي حاجة تعلمني ويخليني في التجارب اللي بعد كده أبدأ أفهم أكتر وثقة الناس فيها بتديني ثقة وبتخوفني ويكون عندي مسؤولية في اللي جاي.
وعن انقسام آراء الجمهور حول العمل، فعلق محمد عبد الرحمن: انقسام آراء الناس معناه أن المسلسل كويس وعامل حالة واختلاف، وفكرة جموح المسلسل ناس هيعجبها وناس لأ ومحدش هيرسى على رأي 100%.
