شاب يطعن اثنين من التلاميذ بسلاح أبيض في أطفيح بعد مشاجرة أمام مدرسة البرمبل الإعدادية
شهدت قرية الكريمات بمركز أطفيح في محافظة الجيزة واقعة مأساوية، بعدما تعرض اثنين من تلاميذ الصف السادس الابتدائي بمعهد الكريمات الأزهري لاعتداء بسلاح أبيض “كتر” من قبل شاب يُدعى عبدالرحمن.ي، وذلك خلال عودتهما من آخر أيام الامتحانات في معهد البرمبل المجاور.
وقال سيف حسين، شقيق الطالب المصاب عبدالله حسين، إن الواقعة بدأت عندما استقل عدد من طلاب معهد الكريمات الثلاثاء الماضي تروسيكل عائدين إلى قريتهم عقب انتهاء الامتحان، وأثناء مرورهم بأحد شوارع قرية البرمبل، فوجئوا بمجموعة من الطلاب يلقون الحجارة عليهم، مما اضطرهم للتوقف ومحاولة الدفاع عن أنفسهم ورد الاعتداء، مشيرًا إلى أنه فجأة تدخل شاب من سكان قرية البرمبل لا علاقة له بالمعهد ويدعى عبدالرحمن.ي، وأشهر سلاحًا أبيضًا "كتر" واعتدى به على اثنين من التلاميذ من بينهم شقيقه، محدثًا إصابات بالغة في مناطق خطيرة من جسديهما.
أضاف شقيق التلميذ المصاب في تصريحات خاصة لـ القاهرة 24 أن طلاب الصف السادس الابتدائي يضطرون لأداء الامتحانات في معهد البرمبل بسبب نقص الإمكانيات في معهد الكريمات بقريتهم الأمر الذي يجعلهم يتنقلون يوميًا بين القريتين لأداء الامتحانات.
"كانوا راجعين من الامتحان واترعبنا من اللي حصل".. رواية شقيق الضحية
وأوضح سيف حسين، شقيق الطفل المصاب عبدالله حسين قائلا: "أخويا في سنة سادسة ابتدائي في معهد الكريمات، وعلشان المعهد مش مؤهل إنهم يمتحنوا فيه، بيروحوا يوميًا يمتحنوا في معهد البرمبل، وفي آخر يوم امتحان كانوا راكبين تروسيكل راجعين من البرمبل على الكريمات، ومعاه زميله عمر حمادة ومجموعة تانيه، وهما راجعين، حصل إن شوية عيال من طلاب معهد البرمبل حدفوا عليهم طوب، فوقفوا علشان يدافعوا عن نفسهم، لحد ما الموضوع هدي، وافتكرنا إن المشكلة خلصت".
وأكمل: "وهما ماشيين لقوا شاب كبير واقف وسط شوية شباب من القرية، وفجأة طلع عليهم عبدالرحمن. ي، وطلع كتر من جيبه، وراح غارس الكتر في بطن أخويا، شق بطنه وصدره بجرح حوالي 40 سم، وراح عور كمان زميله عمر في دراعه وجنبه، وبعدها جري هرب".
وتابع "أخويا نزل على الأرض وهو بيصرخ، الناس شالوه وودوه على طول للمستشفى، بس لما راحوا يخيطوه هناك، قالولنا الحالة صعبة ولازم يدخل عملية فورًا، فعلًا عمل عملية كبيرة علشان ينقذوه، والمشهد كله كان رعب".
واختتم سيف: "اللي عمل كده مش طفل ولا طالب في المعهد، ده شاب معروف بمشاكله، وكلنا عارفين إنه مش أول مرة يعتدي على أطفال أو يعمل مشاكل، واللي حصل ده لازم يتحاسب عليه علشان ده كان ممكن يبقى قتل، مش مجرد إصابة واحنا حررنا ضده محضر رقم 447 لسنة 2025.
