محمد صلاح: ضغط الجماهير سبب تجديدي مع ليفربول.. وكنت سأذهب للسعودية حال رحيلي
تحدث محمد صلاح، لاعب ليفربول ومنتخب مصر، عن بعض الأمور الخاصة بمسيرته الكروية، في حوار خاص وحصري رفقة الإعلامي سيف زاهر.
تصريحات محمد صلاح
وقال محمد صلاح في تصريحات لقناة أون سبورت: الجائزة الأولى من رابطة الكتاب هي أنني لم أتوقع الفوز بها.. والثالثة هي أنني أستطيع الفوز كثيرًا والإحساس مختلف.
وأضاف: سياسة النادي كانت معروفة، ولكن في النهاية توصلت لاتفاق مع النادي واحنا الاتنين مبسوطين، وجمهور ليفربول كان له دور في تجديد مع ليفربول بسبب ضغطهم، أنا في النادي بقالي 7 سنين ومن أول يوم أنا عارف أنهم عايزيني أقعد، وفي الوقت الحالي دومينيك وترينت قريبين مني وقبل كدة كان لوفرين.
وأشار محمد صلاح في تصريحاته إلى أن: كلوب مختلف عن سلوت، ومع كلوب مكنش فيه كلام كتير ولكن مع سلوت فيه كلام أكتر، سلوت صريح وجالي وراني فيديوهات وقالي عايز اطلع أحسن حاجة منك وقولتله لازم تريحني في الملعب عشان اطلع أحسن حاجة عندي، وبصراحة سلوت أخرج أحسن ما فيّا، وبالنسبالي هذا الموسم كرويًا هو الأمتع لي لأن الكرة معايا على طول وإني أكون مرتاح دي حاجة مهمة ليا وبتريحني.
وأردف: مكنتش متوقع إن ليفربول ممكن ياخد الدوري الإنجليزي.
وأوضح صلاح في تصريحاته: أنا عارف أنا عايز اي ومبحبش اتكلم كتير وأنا بعمل اللي أنا عايزه من زمان واللي أنا عايزه عملته وعلاقتي كويسة مع الكل، أنا شخصيتي اختلفت كتير عن زمان، أنا في أوروبا بقالي 14 سنة عشان كدة دماغي اختلفت ولكن في حاجات مش محتاج أثبتها لحد وانا عارف انا مين وعملت اي وعايز اي وبحس اني عايش الحاجة اللي تبسطني.
وأكد محمد صلاح: أنا كنت شايف إن الدوري السعودي فرصة كويسة بالنسبة لي، ولكن في الآخر اتفقت مع ليفربول، وعلاقتي مع الناس في السعودية كويسة لحد دلوقتي، وكنت فاتح مجال لرحيلي هناك وكنت مرحب والناس كانوا مرحبين، وبرشلونة وريال مدريد مكنوش في الصورة أوي للانتقال إليهم في الصيف المقبل.
وشدّد على أن: الدوري الإنجليزي هو الأفضل في العالم، بتشوف كل الفرق لحد الأسبوع الاخير متعرفش مين هيلعب دوري أبطال والبريميرليج هو أفضل دوري في العالم لأن المنافسة لحد النهاية.
وعن موعد اعتزاله، قال “مو”: هعتزل لما أحس إني عايز ابطّل وحاسس إني هلعب لحد 40 سنة، ولكني معرفش هل سأستمر في ليفربول أم لا لحد الاعتزال ولكني سعيدًا في الوقت الحالي.
واستمر في تصريحاته: السيلفي الأخير مع جمهور ليفربول كنت محضره قبلها واحتفال اليوجا كنت محضره وفي حاجات بحضرها دايمًا.
واختتم تصريحاته قائلًا: أعيش حياتي كما أريد لا كما يريد الناس وواجهت صعوبة بسبب اختلاف الثقافات، في إنجلترا لاعب الكرة حياته مبنية على الكرة وفي مصر الكرة جزء فقط من حياة اللاعب، والاستسهال وصعوبة الغربة سبب عودة معظم المحترفين المصريين من إنجلترا، والاحتراف ليس شيئا سهلا وكنت بكلم نفسي في أول فترة في سويسرا.
