الدكتور مهاب مجاهد استشاري الطب النفسي: مفيش شخص توكسيك.. في علاقة توكسيك
في ظل الانتشار الواسع لمصطلحات مثل الشخص السام أو التوكسيك على مواقع التواصل الاجتماعي، خرج الدكتور مهاب مجاهد، استشاري الطب النفسي، لتوضيح المفاهيم النفسية الحقيقية المرتبطة بالعلاقات، مؤكدًا أن المشكلة لا تكون في الأشخاص أنفسهم، بل في طبيعة العلاقة والتفاعل بين طرفيها.
دكتور مهاب مجاهد استشاري الطب النفسي
وقال الدكتور مجاهد خلال حواره مع موقع القاهرة 24: مفيش حاجة اسمها شخص توكسيك، لكن في حاجة اسمها علاقة توكسيك.
وأوضح: العلاقة بتكون نتيجة تفاعل بين شخصين، وده شبه المواد الكيميائية، اللي ممكن تدي نتيجة لطيفة لما تتفاعل مع بعضها، وممكن تولّع لو اتحطت مع مكون تاني.
وأضاف: الجمل المنتشرة زي ابعد عن الشخص السام أو البنت دي توكسيك مش دقيقة، لأن الشخص اللي ممكن يبقى مرهق أو مزعج لطرف، ممكن يكون أجمل حاجة حصلت لطرف تاني في علاقة مختلفة تمامًا.
وأكد: العلاقات السامة ليها علامات واضحة، لكنها مش مرتبطة بدرجة حبك للطرف التاني، لأن الحب مش ثابت وبيتغير مع الوقت، الأهم هو حبك لنفسك جوا العلاقة هل بتحس براحة؟ بثقة؟ هل العلاقة دي بتدعمك لما ترجع من يوم صعب، ولا بتستنزفك؟
وشدد: العلاقة الصحية لازم تكون مصدر للأمان والدعم النفسي، مش سبب في فقدان الثقة بالنفس أو الإحساس بالضغط المستمر.
واختتم حديثه بالتأكيد: على ضرورة مراجعة سلوكياتنا في العلاقات بدل من إصدار أحكام مطلقة على الأشخاص، لأن اللي بيحدد إذا كانت العلاقة سامة ولا لأ، هو التفاعل اللي بيحصل بين الطرفين مش طبيعة شخص واحد بس.
