شيكابالا: اتمرنت في الأهلي بتيشيرت أبيض.. ومسؤولو الزمالك رفضوا يقابلوني
كشف محمود عبد الرازق شيكابالا قائد الزمالك، كواليس اقترابه من اللعب في صفوف الأهلي بعد عودته من الاحتراف بنادي باوك اليوناني.
شيكابالا يكشف كواليس مفاوضات الأهلي لضمه
وقال شيكابالا في تصريحات إعلامية: أنا بعشق الزمالك ولما رجعت من اليونان، مين في مصر كان يقدر يدفع الفلوس غير الأهلي والزمالك؟، ووقتها الزمالك استدعاني 5 مرات للنادي لكن المسؤولين كان بيقفولوا التليفونات علشان محدش يقابلني.
وتابع: الناحية التانية كان زن كل يوم إنهم عايزيني، وكانت أجمد فرقة وقتها في تاريخ الأهلي مع مانويل جوزيه، وأنا كنت بفكر بقلبي وإني عايز أكون في المكان اللي مرتاح فيه نفسيًا، لكن بعد خامس مرة بدأت أفكر بعقلي.
وواصل: قررت إني هقعد مع مسؤولي الأهلي، ولما النادي فتحلي الملعب بالليل علشان أتمرن كنت لابس تيشيرت أبيض، ولما قعدت مع عدلي القيعي قولتله طيب لو الأهلي والزمالك بيلعبوا وأنا احتياطي والزمالك جاب جول فأنا غصب عني هحتفل ووقتها هبطل كرة، كان رده إني هحب الأهلي.
وأضاف: بعد ذلك ممدوح عباس كلمني وقال عايز تعمل إيه؟، ولما عرف إني عايز ألعب في الزمالك قالي خلاص تعالى واعتذرت للأهلي، وعلشان كده ممدوح عباس ليه مكانة في قلبي.
وتطرق شيكابالا للحديث عن بداياته مع الفريق الأول بالزمالك، قائلًا: وقت تصعيدي للفريق الأول أحد المدربين المصريين في الجهاز الفني لفينجادا قالي أنا مش بحبك يالا مع إني عمري ما اتعاملت أو اتمرنت معاه، وكان خلال مشاركة الزمالك في البطولة العربية وأنا كنت برة القائمة.
واختتم شيكابالا تصريحاته: أنا كان عندي 16 سنة والحاجات دي علمتني أكون قوي وأرد في الملعب، وكنت بلعب مع فرقتي وبتمرن صبح وليل، وطلعت بعدها الفريق الأول تاني ولعبت غصب عنه.
