بطل العالم في كمال الأجسام يستغيث: قرار علاجي متنفذش.. وحالتي بتدهور
استغاث أشرف فولة بطل العالم في كمال الأجسام، بسبب عدم تنفيذ قرار علاجه منذ عامين، مما أدى إلى تدهور صحته، حيث يعاني من فشل كلوي.
عدم تنفيذ قرار العلاج
وقال فولة: أنا أشرف فولة، بطل العالم في كمال الأجسام 5 مرات، ولاعب منتخب مصر، ومدرب المنتخب القومي، من حوالي سنتين، جالي فشل كلوي بسبب التكيسات الوراثية، وتعبت جدًا بسببها، ودخلت العناية المركزة، وصرفت فيها كل اللي معايا.
استغاثة أشرف فولة
وأكمل في منشور فيسبوك: بعد كده دخلت مستشفى خاص، وعملت عملية استئصال للكليتين بسبب كمية التكيسات اللي كانت ممكن تتحول لمرض خبيث والعياذ بالله ومن وقتها، ظروفي المادية ساءت جدًا، فاضطريت ألجأ للدولة، وبعت استغاثة للسيد رئيس الجمهورية.
وتابع: الحمد لله، سيادته استجاب مشكورًا، وأمر باستكمال علاجي، واتخاذ اللازم لإجراء عملية زرع الكُلى، الدكاترة وقتها قالولي إن العملية مينفعش تتعمل غير بعد سنتين، وكان محدد لها يوم 18-5-2025، لكن للأسف، كل الناس المسؤولة عن تنفيذ القرار بيتعاملوا ببطء شديد، ولحد النهاردة العملية ما اتعملتش، وحالتي الصحية بتتدهور بسبب جلسات الغسيل الكلوي المستمرة.
واختتم: أنا مش بطلب أي مساعدة مادية،كل اللي بطلبه هو توصيل صوتي للسيد رئيس الجمهورية علشان يعرف إن القرار اللي أصدره ما اتنفذش لحد دلوقتي، وفيه تقصير كبير من المسؤولين.
