روح وواجبي ألحقها.. أول تعليق لفرد الهلال الأحمر بعد تصدره التريند لإنقاذه طائرا بالإسكندرية
تصدر فيديو لأحد أفراد الهلال الأحمر المصري، خلال العاصفة التي ضربت الإسكندرية، وهو ينقذ طائرا من الموت، إذ أخرجه من وسط الثلوج التي أحاطت به.
أول تعليق لفرد الهلال الأحمر بعد تصدره التريند بسبب إنقاذ طائر بالإسكندرية
وقال محمد شعبان أحد أفراد فرق الإنقاذ بالهلال الأحمر في تصريحات خاصة لـ القاهرة 24: كنا بنقوم بشغلنا في منطقة سيدي بشر بالإسكندرية وشوفت الحمامة دي بتطير من بعيد ووقفت على الثلج لحد ما وقعت ودي روح في الأول والأخر، وملهاش علاقة بأي حاجة فا وجبي إني كان لازم ألحقها طبعًا، ورغم إن فيه خطورة كانت عليا وأنا بنقذها لكن ربنا وفقني على كل حال وأنا داخل كانت كل حاجة المصارف اللي في الشارع مفتوحة وكان ممكن يقابلني أي حاجة بس بفضل تدريبات الهلال الأحمر عرفت أنقذها.
وأضاف محمد شعبان، بعد تصدره التريند بسبب إنقاذه لطائر خلال أمطار الإسكندرية: والحمد لله إني قدرت أدخل في وسط الثلج ووصلتلها والحمد لله لما طلعتها كانت لسه عايشة وفعلا متوقعتش الثلج يبقى للدرجة دي، وأنا في إنقاذ الهلال المصري من سنين وعمري ما فكرت في موضوع التريند خالص ومكنتش مستني أجر من حد، حتى ملحقتش أشوف ردود فعل الناس وتعليقاتهم على الفيديو لأننا لسه شغالين لحد دلوقتي وسمعت بس كلام شكر ليا وزملائي كان شعورهم طيب ناحيتي تجاه الموقف وده أنا بعتبره خير لوجه الله ومينفعش نعمل كده عشان التريند.
وشهدت محافظة الإسكندرية هطول للأمطار خلال الساعات الأولى من يوم السبت، مسببة خسائر فادحة ولا زالت فرق الحماية المدنية تتولى إصلاح الأضرار الناتجة عنها.
