هاني سعيد: رابطة الأندية لا تمثلنا وتمثل اللي هي عايزاه وبس
تحدث هاني سعيد، المدير الرياضي لنادي بيراميدز، عن أزمة حسم الدوري، وخصم 3 نقاط من الأهلي في نهاية الموسم بصدد أزمة القمة.
تصريحات هاني سعيد
وقال هاني سعيد في تصريحات تليفزيونية: الدوري لسة متحسمش.. خلص كـ دوري.. لكن نتيجته لسه.. وعندي أمل في المحكمة الرياضية.
وأضاف: المحكمة الرياضية عادلة ودي حاجة بنفتقدها عندنا، وهناك مواقف بتحصل زي دي، أنا ألعب في ملاعب وفرق تانية متلعبش؟ زي ملعب المكس وبتروسبورت وجهاز الرياضة والأهلي والزمالك مش بيلعب عليها، والأندية زي الأهلي والزمالك ملهاش علاقة بالموضوع.
وتابع: ليه الأندية دي مبتلعبش في الملاعب دي؟ العدالة بالمزاج ودا واضح دلوقتي، ورابطة الأندية لا تمثلنا وتمثل اللي هي عايزاه وبس وليست لكل الأندية، وأحيانًا العدالة بتطبق وكانت بتتطبق في مواقف معينة ببطولة الدوري زي الملاعب والمؤجلات.
وأردف: مفيش سبب للشق المستعجل وكنا عاملين حسابنا إن الموضوع هياخد وقت، واتقال إن بيراميدز هيجيب درع دوري ويحتفل، وأنا قولت إن دا مستحيل أنا مش مُغيّب، واحتفال لاعبي بيراميدز دي حاجة بتاعتهم هما، ودي حاجة من المدرب واللاعبين لأنهم حاسين أنهم تعبوا الموسم دا، ولسة مفيش حاجة اتحسمت لحد دلوقتي والدوري فعليًا مازال لم يُحسم.
وأتم هاني سعيد تصريحاته قائلًا: الحكام بيبقا عندها حسابات في مباراة لأندية معينة.
