تظاهرت بالنزيف للاحتيال على المواطنين.. استشاري طب باطني يروي واقعة نصب غريبة من إحدى السيدات

كشف طبيب يدعى الدكتور محمد إسماعيل، استشاري الطب الباطني، عن حادثة نصب غير مألوفة جرت داخل أحد المراكز الطبية الخاصة، حيث استغلّت سيدة في الخمسينات من عمرها مشاعر المواطنين للحصول على مبالغ مالية بطرق احتيالية لاستعطافهم للحصول منهم على أموال.

سيدة تنصب على المواطنين 

وروى الدكتور محمد إسماعيل، تفاصيل الواقعة من خلال منشور له عبر صفحته الشخصية على موقع فيس بوك، قائلا: دخلت عليا إحدى موظفات الريسبشن بالعيادة وكنت بشتغل وقالتلي معلش يا دكتور وحدة ست بتنزف برة وهي مريضة كبد وعاوزة تكشف.. فرديت عليها طبعآ أن دي حالة طوارئ والمكان مش مجهز لحالات الطوارئ ومحتاجة تروح فورآ لأقرب مستشفى لأن دي غالبآ دوالي مرئ محتاجة ربط جراحي في عمليات طوارئ وكمان ممكن تحتاج نقل دم وألبيومين وغيره.

وأضاف قائلا: فبلغوها فقعدت تعيط وتقول ليه كده مش راضيين تستقبلوني دا أنا ست غلبانة دا أنا رحت طوارئ الدمرداش وطلبوا مني إني أجيب حقنة ب 2500 جنيه.. فبلغتني الموظفة مرة تانية ؛ فقلتلها مستحيل الدمرداش ميبقاش فيها ألبيومين دا كلام مش منطقي، في حاجة غلط.

وتابع قائلا: في نفس التوقيت ده كان كل المرضى الموجودين في المكان حواليها وبطبيعة الشعب المصري الطيب في الأزمات وفي ظل عياط الست بدأوا يدولها فلوس وفلوس كتير كمان.. وبمجرد ما خرجت الموظفة من عندي لقت الست وبنتها مشيوا.. وهي خارجة قدام المركز وبعد ما الناس إتلموا حواليها أخدت فلوس من ناس في الشارع.

واستكمل حديثه: في التوقيت ده لاحظت إحدى ممرضات المركز أن اللي نازل من بوقها مش دم وأنه مجرد سايل لونه أحمر لا ريحته ولا قوامه قوام ده بخبرة التمريض.. وإذ فجأة الست وبنتها أول ما حسوا إن أمرهم هيتكشف جروا بسرعة مكوكية ( جري حرامية) ناحية تاكسي كان مستنيهم ومشوا بسرعة واتبخروا كأنهم لم يكونوا.

واختتم الدكتور محمد إسماعيل حديثه قائلا: الحياة دايمآ بتبهرك بالجديد وطرق النصب والاحتيال اللي ما تخطرش على بال الشياطين في أم الدنيا.