ابنة عبد الله مشرف: والدي مبتعد عن الساحة الفنية بسبب سِنه.. وبيزعل من الشائعات
طمأنت ابنة الفنان عبد الله مشرف، الجمهور على حالة والدها الصحية، موضحة أنه مازال يُعرض عليه أعمال فنية ولكنه مبتعد عن الساحة الفنية بسبب كِبر سنه، معربة عن استيائها الشديد بسبب الشائعات التي تلاحقه من وقت لآخر سواء بالمرض أو الوفاة.
وقالت ابنة عبد الله مشرف، في تصريح خاص لـ القاهرة 24: والدي كويس وزي الفل الحمد لله وبيتابع الأخبار والتلفزيون، وبيزعل لما بيشوف الشائعات اللي بتتكتب عنه دي كلها حاجات مالهاش لازمة.
وعن سبب ابتعاده عن الساحة الفنية، فعلقت ابنة عبد الله مشرف: والدي لسه بيتعرض عليه أعمال لكن هو بعيد بسبب سنه، والجمهور بيحبه وأدواره مؤثرة، وأنا بطمن الجمهور هو بخير وصحة وبيقضي وقته معانا أولاده وأحفاده.
عبد الله مشرف
وعلى جانب آخر، سبق وأعلن الفنان عبد الله مشرف، اعتزاله التمثيل نهائيًا بلا عودة، حيث قال في تصريح خاص لـ القاهرة 24: الناس كلها لازم تعرف إن كل واحد ليه وقت يقعد ويعيش حياته، وأنا دلوقتي عايش حياتي مع نفسي والأسرة.. ومش هرجع تاني.. هرجع تاني ليه؟.
وأضاف مشرف: أنا اللي طالب الاعتزال، ومسيرتي عملتها وقدمتها خلاص وانتهت الحمد لله، اكتفيت وشبعت ومقدرش آكل أكتر من طاقتي في الشغل، واللي هوحشه وعاوز يتفرج عليا يتفرج عليا على التلفزيون.
