مديحة حمدي عن انتقادات حجابها في عزاء سميحة أيوب: عيب وبصوا لتاريخي وسلوكي
علّقت الفنانة القديرة مديحة حمدي على الانتقادات التي طالت ظهورها الأخير خلال عزاء الفنانة الراحلة سميحة أيوب، والذي أُقيم مساء الخميس، وذلك بعد أن زعم البعض تخليها عن الحجاب، مؤكدين أن إطلالتها لم تكن معتادة وأنها خالفت الصورة الذهنية التي ارتبطت بها لدى جمهورها.
مديحة حمدي عن انتقادات حجابها في عزاء سميحة أيوب: عيب وبصوا لتاريخي وسلوكي
وقالت مديحة حمدي، في تصريح خاص لـ القاهرة 24: أنا مكنتش عارفة أقف ولا أظبط نفسي، الناس سابت الانهيار اللي كنت فيه وبيركزوا في إيه؟، علاقتي بـ سميحة أيوب من 50 سنة كانت أمي وصديقتي وصندوقي الأسود وأنا بالنسبة ليها كده، وهي مكنتش بتثق في حد غيري أنا.
وتابعت مديحة حمدي: الناس قالت مش لابسة حجابها والناس لما تعقل وتقدر الظروف بدل ما تبص لنصف الكوباية الفاضية تبص للمليان، يا جماعة أنا مكنتش في ظرف طبيعي علشان أقف وأجيب دبابيس وأظبط الطرحة، وأنا مكنتش حاطة طلاء أظافر دي حنة علشان أعرف أصلي بيها، والناس مبتفكرش سابوا انهياري وفزعي واتنين بيسندوني وحاطة حزام في ضهري، وبيركزوا في إيه؟، كونوا موضوعيين وركزوا في الحدث الرئيسي، إحنا فقدنا هرم من أهرامات مصر، هو كان في حد بيتقال عليها سيدة المسرح غير سميحة أيوب؟.
واختتمت مديحة حمدي: يا ناس يا هايفين حرام عليكم، ده عموم الناس زعلوا.. أومال أنا علاقتي بيها إيه، عيب يا ناس بصوا لتاريخي وسلوكي والأدوار اللي أنا بعملها وأولادي وزوجي وعائلتي وأبويا اللي كان وزير، ده عيب أنا كنت عايزة الناس يكون عندهم إنسانية.
