أول تعليق لـ الشيخ صاحب الخطبة بالإسبانية: اتعلمت اللغة في سنة.. ومعنديش مشكلة لو حد من المصليين صحح لي النطق
تداول مستخدمو مواقع التواصل الاجتماعي فيديو لـ خطيب مصري يُلقى خطبة عيد الأضحى باللغة الإسبانية في أحد المدن بإسبانيا، ما أثار حالة إعجاب واسعة عبر منصات السوشيال ميديا.
أول تعليق لـ الشيخ صاحب الخطبة باللغة الإسبانية
وقال الخطيب محمد خليفة في تصريحات لـ القاهرة 24: من أول ما جيت إسبانيا حسيت إن عندي مسؤولية كبيرة لأن معظم الجالية هنا مصريين ولكن للأسف الشباب الصغير والأطفال مش بيتكلموا عربي وأنا كل همي الشباب لأنهم أمل بكرة، وده كان حافز ليا وبدأت أتعلم سواء في مدارس وأخذت كورسات علشان أوصل لمرحلة إتقان اللغة، طبعًا الموضوع بالنسبة لي مكنش سهل إطلاقًا لأني متعلمتش اللغة الإنجليزية ومع ذلك حاولت وربنا كرمني حتى طلبت من الناس اللي هنا في المسجد يسيبوني سنة وقولتلهم بعدها هخطب لكم باللغة الإسبانية وأخذت ده عهد على نفسي.
وواصل: وبالفعل بعد سنة قدرت أخطب لهم باللغة الإسبانية وناس كتير قبلها نصحوني أطلع بورقة علشان اقرأ منها، بس أنا مرضيتش علشان ماتعودش عليها وبالنسبة لي قولت عادي لو حد صحح لي لو أخطأت مفيش حرج ولا أي شيء والحمد لله الموضوع عدى على خير.
وكان فيه كلمات مش عارف نطقها كنت أقف وأسال المصليين عن النطق الصحيح وأعدلها وبكل أريحية وحتى الآن بعلم الأولاد كده في المسجد بقولهم يا بني اللي يطلعلك 3 أخطاء في اللغة الإسبانية وأنت بتتكلم قوله شكرًا وكان الأولاد يحاولوا يطلعوا لي أخطاء لحد ما وصلت لمرحلة معقولة في اللغة.
