مخرجة فيلم ريستارت تهاجم طارق الشناوي بعد انتقاده العمل: مبروك عرفت تبقى تريند
ردت سارة وفيق، مخرجة فيلم ريستارت بطولة الفنان تامر حسني على هجوم الناقد طارق الشناوي، بعد انتقاده للعمل، عقب عرضه حاليًا في دور العرض السينمائي بمصر والوطن العربي.
ووجهت سارة وفيق، رسالة لـ طارق الشناوي عبر حسابها الشخصي بموقع التواصل الاجتماعي فيسبوك، وكتبت قائلة: أستاذ طارق الشناوي في فرق كبير بين الإهانة وبين النقد، حضرتك بتقول إن مفيش موضوع في الفيلم ودي حاجة ضحكتني جدً، لأن إحنا بنتكلم عن موضوع الساعة موضوع العصر أكبر موضوع بيهمنا ويخصنا حاليًا.
وأردفت وفيق: كلامك فكرني بمشهد في الفيلم للفنان محمد ثروت وهوه بيقول أنا أعمل أي حاجة عشان أبقى تريند إحنا خدامين التريند، وسمع كلام الچوكر الفنان باسم سمرة اللي بيشتغل لأغراض ناس، مبروك يا أستاذ طارق عرفت تبقي تريند من غير ما تنقد الفيلم، تخبط في القائمين على العمل بعيدا عن العمل نفسه ولا اتكلمت عن إيجابياته ولا سلبياته.
وأكمات: بل هاجمت أشخاص وبكده طلعت تريند بسرعة، ده موضوع الفيلم اللي أنت مافهمتوش أصلا ولا هو جالك على الجرح؟ وعلى فكرة أنا كمان بعرف أعمل تريند وهنطلع تريند أنا وأنت، بس أنا على حق وهمنشنلك عشان تظهر بسرعة.
وأضافت مخرجة فيلم ريستارت: أنت بتقول إن أغنية المقص عجبتك بس هي مش داخل الفيلم، لا يا أستاذ طارق الأغنية في الفيلم بس شكل اللي بيمليك اتلخبط، أدخل شوف الفيلم اللي أنت مشوفتوش وأحكم عليه بنفسك وبلاش الأفكار السطحية اللي بتقولها على كل الأفلام، لأنك لو شوفت ريستارت فعلًا كنت هتعرف أن قصته أهم ما فيه، وبعدين حضرتك بتتكلم عن أدوات المخرج والمؤلف ولم تستخدم أدواتك كناقد فني ياريتك قولت حاجة نستفيد بيها بدال ما أنت طالع ترمي إفيهات ووحشة كمان.
واختتمت حديثها: الرقم اللي متحقق جوه مصر وبرا مش مجامله يا أستاذ طارق ده الجمهور الحقيقي اللي بنخاطبه دول مش ولاد أختي مثلًا، الفيلم لسه نازل وداخل علي خمسين مليون داخل مصر فقط وده نجاح مفرح كل صناعه الحمد لله، على العموم دي كلمتك ورأيك والجمهور قال كلمته برضو.
