أبوه معاه فلوس كتير وجوّزه غصب عننا.. أول تعليق من أسرة عريس متلازمة داون| خاص
تصدر مقطع فيديو لعروسين تريند منصات التواصل الاجتماعي، إذ تداول مستخدمو السوشيال ميديا، فيديو لحفل زفاف عروسين بالشرقية، ظهر فيه عريس من أصحاب متلازمة داون بجوار زوجته غير المصابة بالمرض، والتي ظهرت دموعها خلال الزفاف، ما أثار حالة من الجدل حول مدى اكتمال أركان هذا الزواج.
أول تعليق من أسرة عريس متلازمة داون بعد الفيديو المتداول
وقال أحد أفراد أسرة عريس متلازمة داون في تصريحات خاصة لـ القاهرة 24: العريس ابن خالتي ودي قصة حزينة، ناس كتير شايفاه إنه مينفعش للزواج، وليه يحصل كده؟ّ! فعلًا لو فكرنا فيها هنلاقيها قصة حزينة، بسبب ظروفه وحالته لأنه من متلازمة داون.
وأوضح: والد العريس دايما ماشي بدماغه، وعلى الرغم أننا رفضنا جوازه، لكن أبوه له رأي تاني ومعاه فلوس كتير، وبالتالي كل كلامه وقراراته من دماغه، ومكنش حد يتخيل ولا يستوعب إن محمد ابن خالتي يتجوز دلوقتي خالص، بس أبوه هو اللي عمل كل حاجة، وده قراره في الأول والآخر، ورغم أن ابنه من ذوي الاحتياجات الخاصة لكنه صمم على زواجه، وأبوه مخلص كل حاجة، حتى العروسة من طرف أخته، هو مكنش يعرفها خالص، لكن ده اللي حصل.
وفي نفس السياق، قال الدكتور إبراهيم سليم، رئيس مجلس إدارة صندوق المأذونين الشرعيين إن الزواج صحيح ومكتمل الأركان، وفقًا لرأي جمهور الفقهاء والمذاهب الـ 4 موضحًا أن شروط صحة عقد القران هي وجود الزوج والزوجة والولي والشهود والايجاب والقبول، لافتًا إلى أن المأذون ينظر في صحة عقد الزواج وعدم وجود موانع شرعية، وفقا لتصريحاته للقاهرة 24.
