حازت الدرجات النهائية.. مريم الأولى على أزهر بني سويف: حلمي أبقى طبيبة وأخدم الغلابة
استقبلت الطالبة مريم ربيع محمود ربيع عبد المهدي، ابنة مركز سمسطا بمحافظة بني سويف، خبر تفوقها على مستوى الشهادة الإعدادية الأزهرية، بعدما حصلت على المركز الأول على مستوى المحافظة بمجموع 510 درجات من 510، بنسبة نجاح 100%، كواحدة من أوائل الجمهورية في نتيجة هذا العام.
وعبرت الطالبة بـمعهد فتيات سمسطا الإعدادي الأزهري، عن سعادتها الغامرة بالنتيجة، وقائلة في تصريح خاص لـ القاهرة 24: كنت منتظرة النتيجة بدعاء وقلق وخوف، لكن الحمد لله، ربنا ما خيّبش تعبي ولا تعب والدي ووالدتي، اللي كان ليهم الدور الأكبر في اللي وصلت له، دايمًا بيشجعوني، وبيوفروا لي جو هادي أقدر أذاكر فيه من غير أي ضغوط.
وأضافت: من أول السنة، كنت حاطة هدف إني أكون من الأوائل، وكنت منظمة وقتي بين المذاكرة والراحة، وما كنتش بسيب أي درس أو معلومة تفوتني، وكنت دايمًا بحاول أراجع أول بأول.
وعن حلمها المستقبلي، أكدت مريم أنها تطمح إلى الالتحاق بكلية الطب البشري، مشددة على أن حلمها لا يقتصر على النجاح الشخصي، وإنما يحمل في طياته بُعدًا إنسانيًا:
نفسي أبقى دكتورة مش بس علشان الشهادة أو المكانة، لكن علشان أساعد الناس الغلابة.. نفسي أبقى سبب في شفاء مريض وفقير مش لاقي حد يعالجه، ودي رسالتي من وأنا صغيرة.
وأردفت مريم حديثها بتأثر: أكتر حاجة فرحتني بعد النتيجة هي دموع الفرحة في عين بابا وماما.. حسيت ساعتها إني قدرت أرد ولو جزء بسيط من تعبهم ودعائهم ليا.
من جانبهم، عبّر والدا مريم عن سعادتهم الكبيرة بتفوق ابنتهم، مؤكدين أن النتيجة لم تكن مفاجأة بالنسبة لهم، لأنهم لمسوا فيها الإصرار والاجتهاد منذ بداية العام الدراسي. وقال والدها: مريم طول عمرها متفوقة، وبتحب الدراسة.. إحنا فخورين بيها جدًا، وربنا يتمم لها على خير ويوفقها في مشوارها اللي جاي.
فيما وجهت والدتها رسالة لكل أولياء الأمور: ادعموا ولادكم واسمعوهم وشجعوهم.. الكلمة الطيبة بتفرق معاهم، والحمد لله، ربنا أكرمنا ببنتنا ورفع راسنا.
وفي ختام حديثها، وجّهت مريم رسالة لزميلاتها وزملائها من طلاب الأزهر: التفوق مش حلم بعيد، هو بس محتاج تعب وتنظيم ورضا الوالدين، وكل اللي يجتهد ربنا هيكرمه.
