رغد الأولى على الشهادة الإعدادية الأزهرية بالفيوم: حلمي أكون دكتورة
حالة من السعادة تعيشها الطالبة رغد سيد أحمد عباس، ابنة قرية الكعابي، بمركز سنورس بمحافظة الفيوم، بعد استقبالها لخبر تفوقها على مستوى الشهادة الإعدادية الأزهرية، بعدما حصلت على المركز الأول على مستوى المحافظة بمجموع 510 درجات من 510، بنسبة نجاح 100%، كواحدة من أوائل الجمهورية في نتيجة هذا العام.
رغد الأولى على الشهادة الإعدادية الأزهرية بالفيوم
وعبرت رغد الطالبة بـمعهد فتيات الكعابي الإعدادي الأزهري بمحافظه الفيوم، عن سعادتها الغامرة بالنتيجة، وقائلة في تصريح خاص لـ القاهرة 24: كنت منتظرة النتيجة بدعاء وكنت واثقه من حصولي علي الدرجات النهائية، ربنا ما خيّبش تعبي ولا تعب والدي ووالدتي، اللي كان ليهم الدور الأكبر في اللي وصلت له، دايمًا بيشجعوني، وبيوفروا لي جو هادي أقدر أذاكر فيه من غير أي ضغوط.
وأضافت رغد: من أول السنة، كنت حاطة هدف إني أكون من الأوائل، وكنت منظمة وقتي بين المذاكرة والراحة، وما كنتش بسيب أي درس أو معلومة تفوتني، وكنت دايمًا بحاول أراجع أول بأول.
وعن حلمها المستقبلي، أكدت رغد أنها تطمح إلى الالتحاق بكلية طب أسنان، مشددة على أن حلمها لا يقتصر على النجاح الشخصي، وإنما يحمل في طياته بُعدًا إنسانيًا موضحة: نفسي أبقى دكتورة مش بس علشان الشهادة أو المكانة، لكن علشان أساعد الناس الغلابة.. نفسي أبقى سبب في شفاء مريض وفقير مش لاقي حد يعالجه، ودي رسالتي من وأنا صغيرة.
وأردفت رغد حديثها بتأثر: أكتر حاجة فرحتني بعد النتيجة هي دموع الفرحة في عين بابا وماما.. حسيت ساعتها إني قدرت أرد ولو جزء بسيط من تعبهم ودعائهم ليا.
من جانبهم، عبّر والدا رغد عن سعادتهم الكبيرة بتفوق ابنتهم، مؤكدين أن النتيجة لم تكن مفاجأة بالنسبة لهم، لأنهم لمسوا فيها الإصرار والاجتهاد منذ بداية العام الدراسي. وقال والدها: رغد طول عمرها متفوقة، وبتحب الدراسة.. إحنا فخورين بيها جدًا، وربنا يتمم لها على خير ويوفقها في مشوارها اللي جاي.
