إحالة ممرض مستشفى تبارك بعد وفاة صغير بحقنة مضاد حيوي للمحاكمة
قال المحامي هيثم بسام دفاع الطفل محمود طفل واقعة مستشفى تبارك ضحية الحقنة، إن جهات التحقيق قررت إحالة فني صحي تمريض ورعاية بمستشفى تبارك لمحكمة جنح التجمع الخامس.
إحالة ممرض مستشفى تبارك
وأضاف بسام في تصريحات لـ القاهرة 24 أن المتهم تم إحالته طبقا لنص المادة 238 فقرة من قانون العقوبات المصري والذي يعاقب بالحبس والغرامة.
وقالت والدة الطفل محمود طفل واقعة مستشفى تبارك في التحقيقات: اللي حصل إن أنا ابنى محمود عنده 4 سنين و9 أشهر وفى يوم 2024/8/25 كان مريض وعنده سخونة ودرجة حرارته مرتفعة، وأنا فحصته وفتحت بوقه فلقيت عنده زي صديد جوه البق فشكيت أن هو عنده اللوز وفعلا طلعت بابني على مستشفى تبارك اللي في التجمع الخامس حوالي الساعة 1.30 صباحا، ودخلت بابني كشفت في العيادات الخارجية وفي دكتور أنا معرفش اسمه دخل كشف على ابني بالسماعة وفتحله بقه وشخص ابني إنه عنده اللوز عنده ملتهبة وقرر ينقل لابني محاليل.
وأضافت والدة الطفل محمود ضحية مستشفى تبارك: الدكتور وصفله حقنة مضاد حيوي وفي ممرض معرفش اسمه عمل اختبار لابني على إيده عشان يعرف هو هيستقبل المضاد الحيوي ولا لأ، ودي بإنه يعمل دايره بقلم على إيده ويديله جزء بسيط من الحقنة بتاعت المضاد الحيوي ويستني يشوف دراع ابني هيحمر ولا لأ وفعلا الممرض عمل الاختبار ده لابني والدكتور كان موجود ساعتها وبعدها بحوالي 5 دقائق إيد ابني احمرت، والممرض قالي إن كده ابني عنده حساسية ومينفعش ياخذ الحقنة والدكتور المعالج قال إن ابني ياخذ الحقنة على الرغم من نتيجة الاختبار.
وتابعت والدة الطفل في التحقيقات: فعلًا الممرض أدى لابني الحقنة بتاعت المضاد الحيوي وأول ما ابني أخد الحقنة قالي إنه بطنه وجعاه وقالي يا ماما وعينه اترفعت لفوق وطلع رغاوي من بقه والممرض صرخ وقال إن ابني بيموت، فالدكتور بص على ابني وقالي أنا علجتهولك وإن ابنك مريض نفسى وفجأة طلعوني من الأوضة ودكاترة كتير دخلت الأوضة اللي فيها ابني وأنا كنت منهارة معرفش هما بيعملوا إيه جوه وابني حالته ايه، فكلمت أخويا وجوزي حكتلهم على اللي حصل وطلبت من المستشفى يدخلوني لابني ومنعوني وطلبت منهم إني أنقل ابني المستشفى الجوي فرفضوا برضه وأخدوا مني التذكره بتاعت دخول ابني المستشفى وكل ورقه.
وواصلت الأم في التحقيقات: قالولي إن ابني هيتنقل مستشفى سيد جلال وفعلا في عربية إسعاف جت ونقلت ابني والدكتور المعالج كان مع ابني وماسك أنبوبة حاططها عن ابنى وقاعد يدوس عليها بايده ورفضوا يركبوني مع ابني في عربية الإسعاف، وأنا طلعت وراهم مع أخويا على مستشفى سيد جلال ودخلوا ابني الرعاية المركزة وحطوه على تنفس صناعي ورفضوا هناك يدخلوني لابني وفضلت قاعدة هناك ساعات لحد ما أعلنوا وفاة ابني محمود وطلعنا تصريح الدفن واستلمنا ابني ودفناه بعد كده أنا وجوزي حسن قررنا نعمل محضر في الطبيب المعالج بتاع مستشفى تبارك لأخد حقى منه عشان هو ارتكب إهمال طبي جسيم فقمت بعمل محضر بتاريخ 2024/8/28 بقسم شرطة التجمع الخامس وحضرت اليوم لشرح الأمر.
