بعد اندلاع الحريق بها.. القصة الكاملة لانفجار سيارة Porsche Taycan 4S الكهربائية على طريق السويس
شهد طريق السويس حادث سير خطير تعرض له شاب بسيارة Porsche taycan 4s موديل 2023 الكهربائية، حيث انفجرت السيارة بالكامل على الطريق.
القصة الكاملة لانفجار سيارة Porsche Taycan 4S الكهربائية على طريق السويس
وفي هذا الصدد، قال أحمد طاهر مالك السيارة عبر صفحته الرسمية على فيسبوك: أنا صاحب العربية الـ Porsche Taycan 4S موديل 2023 اللي انفجرت على طريق السويس من يومين، اللي حصل إن فجأة اتخبطت من الجنب من عربية جاية من ورايا، والعربية فقدت السيطرة بالكامل، والـ Traction Control مشتغلش كالمتوقع، ولفت بيا واتصادمت بحاجز خرساني بين الاتجاهين وبعربيه تانيه.
وتابع قائلا: الـ Airbags اشتغلت، وبدأ يطلع دخان كتير جدًا، حاولت أفتح الباب أنا والشخص اللي كان معايا، بس البابين كانوا معلقين وفتحوا بعد معاناه ومكانش في نفس في العربيه كانت العربيه من الداخل مليانة دخان.
وأضاف: حزام الأمان كان ضاغط على جسمي بشكل عنيف، ولما خرجت حسيت بألم شديد جدًا، ولما روحت المستشفى اكتشفت إن عظم الحوض اتكسر تمامًا بسبب الضغط والتصادم، وبمجرد ما خرجت من العربيه اضطريت اسحف عشان ابعد عن العربيه والناس بدأت تصرخ وتقولنا ابعدوا بسرعة عن العربية، وفعلًا بعد لحظات العربية انفجرت بالكامل، وتحولت حرفيًا إلى كتلة نار، لحد ما بقت حتة فحم.
