بعد تكرار الغرق.. غطاس بشركة O2 Diving يكشف تفاصيل وفاة الغطاس محمد يسري: هواء تحت الماء السبب| خاص
توفي غطاس يدعى محمد يسري يبلغ من العمر 28 عامًا، من محافظة الإسكندرية، غرقًا بالسويس، خلال تأدية مهام عمله، حيث يعمل غطاسا بحريا لدى شركة O2 Diving لأعمال الملاحة، وذلك في أقل من مرور شهر على غرق محمد نبيل وحسن عدلي الغطاسين ضحايا إهمال الشركة.
سبب وفاة الغطاس محمد يسري
وكشف غطاس يعمل لدى شركة O2 Diving لأعمال الملاحة، بالعين السخنة، تفاصيل وفاة الغطاس محمد يسري غرقًا أثناء تأدية مهام عمله اليوم، حيث قال: الوفاة ربما تكون بسبب حاجه في الهواء المستخدم تحت الماء، يا حاجة حصلت معاه تحت، لأن إحنا استخرجنا الجثمان بعد نزول محمد بربع ساعة، ومفيهوش كدمات ولا خدوش، والواقعة قيد التحقيق ومنتظرين نتيجة الطب الشرعي.
وقال غطاس يعمل لدى شركة O2 Diving لأعمال الملاحة، بالعين السخنة، وزميل الغطاس محمد يسري المتوفى غرقًا: معروف إن الغطس مهنة خطيرة وكل اللي بيدخلها عارف إنه ممكن يموت في أي وقت، كل شيء وله سبب، وحادث النهاردة اللي توفي فيه محمد يسري كان بسبب الهواء.
تفاصيل غرق الغطاس محمد يسري
وتابع زميل الغطاس محمد يسري المتوفى غرقًا بالسويس: ما بين نزول محمد البحر لحد ما طلع غريق علي وش المياه ربع ساعة بالضبط ويمكن أقل، هو نزل المياه على الساعة 1 الظهر، كان نازل ينظف مصافي ولابس تانك على ظهره احتياطي، ومعاه مصدر هواء تاني اسمه نرجيلة، وفي حد فوق شاف النرجيلة اللي محمد مربوط فيها وبيتنفس منها مشدودة جامد، فبيسحب لقاها تقيلة، فضل يسحب لحد محمد طلع على وش الماء قاطع النفس، وكلنا نزلنا البحر طلعناه وعملنا له إسعافات أولية حوالي 20 دقيقة لحد ما فقدنا الأمل.
وتابع: حسن عدلي ومحمد نبيل ومحمد يسري زمايلي وإخواتي وأنا من الناس اللي طلعتهم وشهدت وفاتهم، ومحمد يسري غطاس قديم وعنده خبرة كبيرة في مجال الغطس، وأنا أول ما تعلمت شغل المراكب كنت بنزل معاه وهو اللي معلمني جزء كبير من الشغل، والشركة قبل وفاة محمد نبيل وحسن عدلي كانت مهملة في المعدات والصيانة، لكن بعد حادث الغرق اللي فات عالجوا كل المشاكل دي، وربما يكون محمد يسري مات بسبب الهوا.
