يسري نصر الله: عادل إمام مبيحبش الحريف وبيحس إن دراعه اتلوى.. وعبلة كامل فرضت نفسها في فيلم المدينة
حل المخرج يسري نصر الله، ضيفًا على الإعلامية ريهام السهلي، في برنامجها الرحلة، المذاع عبر شاشة قناة DMC Plus، وتحدث خلال اللقاء عن مشواره الفني، وذكرياته مع الراحل يوسف شاهين، وتفاصيل طفولته.
أبرز تصريحات يسري نصر الله
- بحترم شخصياتي، ولما بدي ورش للشباب اللي عايزة تمثل بقولهم دايمًا خلي الشخصية أذكى منك، متبقاش أنت أذكى أو دمك أخف من الشخصية اللي بتقدمها.
- أختي ناهد نصر الله قريبة مني أوي، وواقفة على الأرض يمكن أنا حالم أكتر، ولما الصماويل بتفك في التصوير بترجعني تاني، وهي بني آدمة أوي ومش حاسة أنها لوحدها في العالم.
- طفولتي أنا وأختي ناهد مكنتش سعيدة، والدي كان قاسي جدًا وعيشنا فترة كبيرة لوحدنا خالص بعد انفصال أهلنا، فالطفولة مكنتش سهلة.
- من وأنا عمري 6 سنين كنت عارف أن مهما حصل هبقى مخرج سينما.
- مكنتش بحب أفلام يوسف شاهين لغاية ما شفت فيلم عودة الأبن الضال، وخلاني أنظر لإمكانية عمل سينما في مصر مش دعائية.
- يوسف شاهين كان غول، وعمره ما كان بيتمسكن في عصبيته، والجيل ده كله كانوا أدرجية كبار.
- عادل إمام مبيحبش فيلم الحريف إطلاقًا، وكان حاسس طول الفيلم أنه اتلوى دراعه.
- عبلة كامل هي اللي فرضت نفسها في فيلم المدينة أنها تعمل دور أم بسمة، قولتلها إنتي مجنونة دي من سنك، قالتلي ملكش دعوة أنا هعمله، وعملت دور رهيب.
- لازم المخرج طول الوقت يجدد الرصيد بتاعه، مفيش حاجة اسمها رصيد ثابت.
- لسه معملتش الفيلم اللي أقدر من خلاله أتعامل مع العالم بتاع النهاردة اللي هو غريب جدًا.
