طارق الشناوي: لايفات التيك توك مش تسول.. ومصدر دخل كويس للفنانين
كشف الناقد الفني طارق الشناوي، عن رأيه في لايفات الفنانين على تطبيق تيك توك، بعدما هاجمت الفنانة فريدة سيف النصر هؤلاء الفنانين، واصفة ما يفعلوه بالتسول.
وقال طارق الشناوي لـ القاهرة 24: أنا ضد إننا نقول على لايفات التيك توك تسول، معروف إيه هو التسول الحقيقي، لكن لما فنان يطلع يقدم محتوى حتى لو كوميدي أو ملوش معنى قوي.. فين المشكلة؟.
وتابع طارق الشناوي: ليه بنهاجم زملاء المهنة اللي ممكن معندهمش غير المصدر ده اللي بيجيلهم فلوس، وحتى لو بيطلعوا يتكلموا فقط مع الجمهور، مدام مفيش عري أو محتوى ضد الأخلاقيات يبقى مفيش مشكلة، والتسول ده اتهام قاسي مينفعش نتهم به زملاء، زي بالضبط انتقاد الناس للفنان اللي بيتجه لتقديم البرامج، مش لاقي أدوار وقرر يحاول ويشتغل على نفسه في مجال تاني، برضه مفيهاش مشكلة.
فريدة سيف النصر تطالب بمنع لايفات الفنانين على تيك توك
وفي هذا السياق، سبق وطالبت الفنانة فريدة سيف النصر نقابة المهن التمثيلية والمسؤولين بضرورة التدخل لمنع ظهور الفنانين في بث مباشر على تطبيق التيك توك، وذلك بسبب انتشار فيديوهات غير لائقة لبعض الفنانين الذين يظهرون في هذا التطبيق.
وكتبت عبر حسابها الشخصي بموقع التواصل الاجتماعي فيس بوك: الناس اللي قلبوها تسول، ملعونة الفلوس اللي توطي النفوس، الكارثة والمصيبة في اللي عندهم شهرة وفلوس، وبيقللوا من نفسهم في فيديوهات رخيصة.
