مش هدخل في نواياه.. مدحت العدل يرد على تصريح راغب علامة عن أوبريت الحلم العربي
علق السيناريست الدكتور مدحت العدل، على تصريح المطرب اللبناني راغب علامة بشأن أوبريت الحلم العربي الشهير الذي أكد خلاله أنه كان عملًا تجاريًا ليس به موقف تجاه فلسطين.
وقال السيناريست مدحت العدل في تصريح خاص لـ القاهرة 24: العمل تجاري وذات قيمة أدبية وميمنعش إني أعمل عمل تجاري وأكسب منه قيمة تجارية وفي نفس الوقت له موقف يخص القضية.. لو غناه على أنه تجاري هو حر، لكن أنا كتبته بعروبتي ومؤمن بالقضية الفلسطينية، وفيه فرق بين ده أنك بتغني وخلاص وبين أنك بتغني من ضميرك اللي جواك.
وأضاف مدحت العدل: مش هدخل في النوايا لو غناه على أنه تجاري هو حر، ممكن يكون جاي يغني عشان كان فيه ناس كتيرة أو لأسباب أخرى هو حر، لكن أنا كتبت من جوايا لأني مؤمن بالقضية الفلسطينية ومن قلبي، لكن فكرة أنك بتغني وخلاص أو بتغني من ضميرك الصادق اللي جواك، والأوبريت كان تجاري وله قيمة أدبية.
تصريح راغب علامة
وسبق وقال راغب علامة خلال مؤتمر صحفي خاص به أقيم ضمن فعاليات مهرجان موازين: أوبريت الحلم العربي كان تجاري ومش وراه موقف محدد، ولو حبيت أعمل حاجة زي كدة هيكون موضوع عن الإنسانية.. مش هعمل حاجة عن مواضيع عربية أو إسلامية، هقدم موضوع عن الإنسانية بالعرب وما نشهده من جرائم وحروب بنشوفها مؤخرا.
