الناس اللي بتطفي النور
فيه نوع كده من الناس… مهما قلت لهم فكرة حلوة، أو عرضت عليهم فرصة، أو حكيت لهم عن حلم… أول رد فعل ليهم: "ما تفرحش قوي، الدنيا مش أمان"، "جربنا قبل كده وفشلنا"، "ماشي بس مين هيهتم؟"، "وأنت فاكر نفسك هتعمل إيه؟"
ناس كأنها متخصصة في إنها تطفي النور… حتى لو نور بسيط طالع من جواك.
أنا فاكر بنت صاحبتي، كانت دايمًا بتحلم تعمل مشروع صغير خاص بيها… كانت بتحب التفصيل واللبس. ولما أخدت الخطوة، وراحت تحكي لأختها الكبيرة، اللي بتحبها جدًا، عشان تاخد رأيها، ردت عليها بجملة قتلت كل حاجة جواها: "يعني فاكرة الناس هتشتري من حد معندوش خبرة؟"
الجملة دي فضلت ترن في ودنها شهور… ومع كل مرة بتقرب من الحلم، كانت بترجع خطوة. مش لأن الفكرة وحشة… لكن لأن الصوت السلبي كان أقوى من الحماس اللي جواها.
أوقات، الطاقة السلبية مش بتيجي من ناس غريبة… ساعات بتيجي من ناس إحنا بنحبهم، وبنصدق كلامهم كأنه مُنزل.
السلبي مش دايمًا بيزعق… ساعات بيكون بيهمس، بس بيهمس خوف، شك، تردد. السلبي مش لازم يكون شرير… ممكن يكون عنده نية كويسة، بس متعود على السواد، فشايف بيه كل حاجة.
بس خد بالك…
الناس دي مش غلط دايمًا، ولا هم وحشين… بس وجودهم جنبك وقت البدايات، بيكسر فيك أكتر ما يبنيك.
علشان كده، خلّي بالك من الناس اللي حواليك وقت الحلم. الحلم بيبدأ ضعيف، محتاج حضن، محتاج ضهر، مش حد يقوله: "مش هتنجح"، ولا حد يسأله: "يعني شايف نفسك هتعمل إيه؟"
ألبرت أينشتاين قال: "ابقَ بعيدًا عن الأشخاص السلبيين، لأنهم يملكون مشكلة لكل حل".
يعني مهما كنت شاطر، حابب، ناوي… الشخص السلبي هيعرف يطلعلك فيها عيب. هيفصّل لك الفشل على قدك… ويحلف لك إنك مش قدّه.
وعلشان كده، لازم تبقى واعي.
مش كل رأي تسمعه لازم تصدقه.
ومش كل تحذير لازم يمنعك.
ومش كل صوت عالي يعني عنده حق.
فيه فرق كبير بين اللي بينبهك بحب، واللي بيكتمك بخوفه.
اللي بينبهك، هيقولك: "خد بالك من دي"، لكن هيشجعك. إنما اللي خايف، هيقولك: "بلاش خالص"، وهيزرع فيك شك، كل مرة تيجي تقوم.
في حياتك، خلي حواليك ناس بتحب النور… ناس تقولك "جرب، ولو وقعت أنا جنبك"، ناس تشوف الحلو في فكرتك، مش بس الفشل اللي ممكن يحصل.
لو حواليك ناس كده؟ امسك فيهم بإيدك وسنانك.
ولو لقيت نفسك محاط بناس كل رد فعلهم: "دي مش هتنفع"، "محدش بيعمل كده"، "اللي قبلك وقع"، فاعرف إنك محتاج تمشي… مش لأنك متكبر، لكن لأنك بتحمي حلمك.
أحلامنا صغيرة في الأول… شبه الأطفال… محتاجة حضن مش نقد.
وإوعى تكون أنت كمان من النوع اللي بيطفي النور، حتى لو بنية طيبة.
لما تلاقي حد بيبدأ، شجعه، حتى بكلمة.
قول له: "متحمس أشوفك هتعمل إيه"، أو "أنا شايفك تقدر".
ممكن جملتك البسيطة، تبقى الوقود اللي يخليه يكمل، بعد ما كان هيمشي.
وفي الآخر… افتكر دايمًا:
السلبيين مش دايمًا وحشين، لكن دايمًا خطرين على أي حاجة بتبدأ صغيرة… فلو أنت في أول الطريق، احمي نفسك، واحمي حلمك، وامشي بعيد عن اللي بيشوف الغلط قبل النور.
خلي صوتك أعلى من أصواتهم، حتى لو بترتعش… وخلي قلبك، مش شكوكهم، هو اللي يقرر.
