ميدو يوجه رسالة شكر لمسؤولي الأهلي ويكشف رأيه في مستوى الفريق بمونديال الأندية
حرص أحمد حسام ميدو، نجم نادي الزمالك السابق، على توجيه الشكر لـ مسؤولي النادي الأهلي والكشف عن رأيه في مستوى الفريق بكأس العالم للأندية.
تصريحات أحمد حسام ميدو
وقال ميدو في تصريحات تليفزيونية: ممكن أقول رأيي في تجربة الأهلي في كأس العالم للأندية ولا هيطلعوني عن الإسلام؟ بقول للمسؤول الإعلامي في الأهلي برافو عليك قدرت تستخدم تصريحاتي إنك تستنفر اللاعيبة في ماتش بورتو.
وأكمل ميدو: قائمة الأهلي الحالية كانت تخليه يصعد لدور الـ 16 في كأس العالم للأندية، بس الضغوط أثرت عليهم بشكل سلبي، وإدارة الأهلي وصلت رسالة إنهم جابوا لاعيبة جديدة عشان البطولة دي كل الفرق اللي راحت البطولة راحت إنها مهمة بس مش حياة أو موت وهي تحضيرية لموسم مهم.
وواصل ميدو: الطريقة اللي اتبنت بيها قائمة الأهلي عملت مشكلة، لازم يبقى في منافسة آه بس مينفعش يكون عندك تريزيجيه وبن شرقي لأن الاتنين ميقبلوش يقعدوا احتياطي ولاعيبة صنعت تاريخ زي الشحات وأفشة وطاهر وجايب لاعيبة من بره وتبدأ بيهم من أول ثانية.
واختتم تصريحاته قائلا: عشان تسيطر على مجموعة الأهلي النجوم، لازم يكون معاك مدرب اسم كبير وصاحب تاريخ كبير أنا بقول رأيي وأنا محلل مش مسؤول في الزمالك.
