ولسه الكارتة شغالة.. لميس الحديدي عن حادث فتيات الإقليمي: الأمل مات مع البنات على طريق الموت
عرضت الإعلامية لميس الحديدي، صورة لجنازات فتيات قرية السنباسة بمنوف بمحافظة المنوفية، قائلة: هذه الصورة لن تنساها مصر، لو تشوفها أول مرة هتتخيل إنها مرسومة، وإنها مش حقيقية، ولما نقترب منها هنلاقيها وشوش ناس غلابة، أهالي 18 فتاة في عمر الزهور.
ولسه الكارتة شغالة.. لميس الحديدي عن حادث فتيات الإقليمي: الأمل مات مع البنات على طريق الموت
وأضافت خلال تقديمها برنامج كلمة أخيرة على شاشة ON: عمال تراحيل بنات العنب على أمل تحسين أحوالهم بيومية 130 جنيه، كان عندهم أمل: واحدة بتتجهز، وواحدة عاوزة تتجوز، والتالتة عاوزة تبقى مهندسة أو ممرضة، لكن للأسف، الأمل مات مع البنات على طريق الموت على الدائري الإقليمي، وزي ما راح قبلهم كتير، ودي مش أول مرة وشكلها مش هتبقى آخر مرة على نفس الطريق.
وأردفت: طريق الموت مش لقب أطلقه الصحفيون، ده الاسم اللي بيستخدمه أهل المنوفية وبيتشاهدوا وهما طالعين عليه كل يوم، وفيه نواب في البرلمان قالوا: عشرات الحوادث يوميًا.
وتابعت: من امبارح لحد النهاردة ولسه دم البنات منشفش، فيه 3 حوادث حصلت على مدار 24 ساعة في نفس المكان، فيه إيه يا جماعة؟ ولسه طريق الموت مفتوح، ولسه بيحصد الأرواح، ولسه الكارتة شغالة بتلم الفلوس، ومش عارفين بتتصرف فين ولا على إيه؟ الطريق مفتوح لأنه مهم، وبالتالي الكارتة شغالة.
وذكرت أن كل عناصر الموت توافرت في حادث أشمون، قائلة: الطريق بايظ، فيه مشكلة ما بيتصلحش من سنة، بيتعمله صيانة من 2023، لا توجد إشارات على الطريق، بالإضافة لسائق تحت تأثير المخدرات، وكل عناصر الموت كانت متكاملة.
